Tájikstan ShYU-daǵy basymdyqtaryn aıqyndady
ASTANA. KAZINFORM — 20 qazanda Tájikstan prezıdenti Emomalı Rahmon Dýshanbege ShYU Úkimet basshylary keńesiniń otyrysyna kelgen Shanhaı yntymaqtastyq uıymyna múshe memleketterdiń delegatsııa basshylarymen kezdesti, dep habarlaıdy Kazinform agenttiginiń Dýshanbedegi menshikti tilshisi.
Emomalı Rahmon qatysýshylardy qarsy ala otyryp, qazirgi jahandyq protsester ShYU-nyń syndarly dıalog pen ózara tıimdi yntymaqtastyq alańy retindegi ózektiligin rastaıtynyn atap ótti.
– Biz Uıymnyń beıbitshilik pen turaqtylyqty, damýdy jáne onyń jumys isteý aımaǵyndaǵy senim atmosferasyn qamtamasyz etýdegi rólin odan ári nyǵaıtýǵa múddelimiz, - dedi Tájikstan Prezıdenti.
Ol Dýshanbe qaqtyǵystardy beıbit jolmen sheshýdi jáne BUU-nyń ortalyq úılestirýshi rólin kúsheıtýdi jaqtaıtynyn eske saldy. Osyǵan baılanysty Rahmon BUU Bas Assambleıasy qoldaǵan Tájikstannyń 2027-2036 jyldarǵa arnalǵan bolashaq urpaq úshin beıbitshilikti nyǵaıtýdyń halyqaralyq onjyldyǵyn jarııalaý týraly bastamasyn atap ótti.
Emomalı Rahmonnyń ózara saýda men ınvestıtsııany keńeıtý, kólik baılanysyn damytý, ónerkásiptik jáne agroónerkásiptik yntymaqtastyq, tsıfrlyq ekonomıka jáne jasyl tehnologııalar, energetıka jáne azyq-túlik qaýipsizdigin nyǵaıtý máselelerine toqtaldy.
Kezdesýde qaýipsizdik máselelerine erekshe nazar aýdaryldy. Tájikstan Prezıdenti terrorızm, ekstremızm, radıkalızm, kıberqaýipter, esirtki tasymaly jáne transulttyq uıymdasqan qylmysqa qarsy birlesken kúresti kúsheıtý týraly aıtty. Osyǵan baılanysty ol Dýshanbede ShYU-nyń Esirtkige qarsy ortalyǵyn qurýdyń mańyzyn atap ótti.
Rahmonnyń aıtýynsha, Tájikstan ınnovatsııalyq tehnologııalar, jasandy ıntellekt jáne osy salalarda joǵary bilikti mamandardy daıarlaý salasyndaǵy yntymaqtastyqty keńeıtýge múddeli.
Taraptar sondaı-aq mádenı-gýmanıtarlyq ózara is-qımyl, klımattyń ózgerýine beıimdelý, qorshaǵan ortany qorǵaý, muzdyqtardy saqtaý jáne sý resýrstaryn tıimdi paıdalaný máselelerin talqylady.
Tájikstan men Qytaı Pamır arqyly tsıfrlyq dálizdi iske qosqanyn jazǵan edik.
