Tájikstan Rogýn GES-in salýǵa 1 mlrd dollar tartpaq
ASTANA. KAZINFORM - 2026 jyly Tájikstan aýmaǵynda salynyp jatqan Rogýn GES-i qurylysyna 1 mlrd AQSh dollaryn baǵyttaý josparlanyp otyr. Bul týraly Kazinform agenttiginiń menshikti tilshisi habarlaıdy.
Baspasóz máslıhatynda Tájikstan Respýblıkasynyń qarjy mınıstri Faızıddın Kahhorzoda bıyl úkimet Rogýn GES-iniń qurylysyna keminde 10 mlrd somonı (shamamen 1 mlrd dollar) bólýdi kózdep otyrǵanyn málimdedi. Onyń ishinde respýblıkanyń óz qarajaty 8,2 mlrd somonıdi (872 mln dollar) quraıdy jáne bul qarjy memleket bıýdjeti esebinen qarastyrylǵan.
Mınıstrdiń aıtýynsha, halyqaralyq seriktesterden ınvestıtsııa tartý arqyly qarjylandyrý kólemi ulǵaıýy múmkin.
— Tájikstan úkimeti bul qarajatty alý úshin belgili bir talaptardy oryndaýy tıis edi. Barlyq sharttar tolyq oryndaldy, nátıjesinde Dúnıejúzilik bank tarapynan 350 mln dollar kólemindegi alǵashqy transh boıynsha qarjylandyrý bastaldy. Sondaı-aq osy uıymnan qosymsha 300 mln dollar bólý jónindegi kelissózder sátti aıaqtaldy. Bul qarajatty bıylǵy jyldyń ortasynda alýǵa bolady, — dedi F. Kahhorzoda.
Onyń sózinshe, sondaı-aq Islam damý banki, Saýd Arabııasynyń damý qory, Kýveıttiń damý qory jáne Azııa ınfraqurylymdyq ınvestıtsııalar banki arqyly jalpy somasy 850 mln dollar bolatyn qarajat tartý rásimderi aıaqtalýǵa jaqyn.
Rogýn GES-i Vahsh ózeni boıynda, Rogýn qalasyna jaqyn mańda salynyp jatqan iri gıdroelektr stantsııasy. Joba tolyq aıaqtalǵannan keıin bıiktigi 335 metr bolatyn bóget álemdegi eń bıik GES bógeti atansa, ornatylǵan qýaty 3780 MVt stantsııa Ortalyq Azııadaǵy eń iri energetıkalyq nysanǵa aınalady. Óndiriletin elektr energııasyn Pákistan eline CASA-1000 jobasy aıasynda eksporttaý josparlanǵan.
Osyǵan deıin Ózbekstannyń Tájikstandaǵy «Rogýn» GES-inen elektr energııasyn ımporttaıtyny týraly jazdyq.