Tájikstan prezıdenti birqatar halyqaralyq sý bastamasyn usyndy
ASTANA. KAZINFORM – Tájikstan prezıdenti 4-shi Halyqaralyq sý konferentsııasynyń ashylýynda sóılegen sózinde sý máselelerin halyqaralyq turaqty damý kún tártibine shyǵarý úshin birqatar praktıkalyq sharalardy usyndy, dep habarlaıdy Kazinform menshikti tilshisi oqıǵa ornynan.
Emomalı Rahmon Tájikstannyń Dýshanbe sý protsesi aıasynda ınklıýzıvti jáne ashyq halyqaralyq platforma qurý boıynsha kúsh-jigerin jalǵastyryp jatqanyn atap ótti.
Ol respýblıkanyń 2030 jylǵa qaraı ulttyq jáne okrýgtik deńgeılerde sý resýrstaryn keshendi basqarýdy tolyq engizýdi kózdep otyrǵanyn málimdedi. Tájikstan sonymen qatar sý únemdeıtin tehnologııalardy paıdalanýdy 40 eseden astam keńeıtýdi jáne sýdy tıimdi paıdalanýdy klımattyń ózgerýine beıimdelýdiń negizgi quralyna aınaldyrmaq.
Tájikstan basshysy sý salasyndaǵy transshekaralyq yntymaqtastyqty damytý aıasynda Ortalyq Azııadaǵy senim, seriktestik jáne syndarly dıalogty odan ári nyǵaıtýǵa shaqyrdy.
- Tájikstan Aral teńizin qutqarý halyqaralyq qoryn turaqty damý múddesinde kúrdeli sý máselelerin talqylaý jáne sheshý úshin mańyzdy aımaqtyq platforma retinde qarastyrady jáne onyń aıasynda Ortalyq Azııanyń Memleketaralyq energetıkalyq komıssııasyn qurý qajet dep sanaıdy, - dedi E.Rahmon
Jahandyq yntymaqtastyqtyń jańa kezeńine ótý úshin «Dýshanbeniń sý máseleleri boıynsha sheńberlik baǵdarlamasyn» qurý usynyldy.
- Bul sheńberlik baǵdarlama sý salasyndaǵy aǵymdaǵy protsesterdi nyǵaıta alady jáne praktıkalyq nátıjelerge qol jetkizý úshin birlesken kúsh-jigerdi úılestirý jáne biriktirý úshin qolaıly negiz jasaı alady, - dep atap ótti Tájikstan prezıdenti.
Emomalı Rahmon sózin qorytyndylaı kele sý dıplomatııasyn ilgeriletý jáne nyǵaıtý, sondaı-aq álemdik qaýymdastyqtyń kúsh-jigerin biriktirý úshin Tájikstan Respýblıkasy prezıdentiniń sý resýrstary salasyndaǵy halyqaralyq syılyǵy qurylǵanyn habarlady.
4-shi Halyqaralyq sý konferentsııasy 28 mamyrǵa deıin jalǵasady. Іs-sharaǵa 110 elden 2500 qatysýshy, onyń ishinde 75 halyqaralyq jáne aımaqtyq uıymnyń ókilderi, sondaı-aq álemniń 170 ǵylymı-zertteý mekemesiniń sarapshylary jınaldy. Forým jumysyn halyqaralyq jáne jergilikti BAQ-tan 300-den astam tilshi habarlap jatyr.
Osyǵan deıin Qazaqstan, Tájikstan jáne Ózbekstan jazǵy sý rejımin keliskenin habarladyq.
