Tájikstan Prezıdenti Aqordaǵa keldi
ASTANA. KAZINFORM — Memleket basshysy Qasym-Jomart Toqaev Tájikstan Prezıdenti Emomalı Rahmondy Aqordada qarsy aldy.
Mártebeli meımannyń qurmetine Áskerı áýe kúshteriniń tikushaqtary Qazaqstan men Tájikstannyń Memlekettik týlaryn jelbiretip, Aqorda aldynan ushyp ótti.
Mártebeli qonaq saparyna oraı saltanatty rásimder zalynda Qurmet qaraýyly sap túzedi. Taraptar resmı delegatsııa múshelerin bir-birine tanystyrdy. Odan keıin Qurmet qaraýyly rotasynyń komandıri saltanatty raport berdi.
Prezıdenttik orkestr Qazaqstan men Tájikstannyń memlekettik ánurandaryn oryndady.
Qasym-Jomart Toqaev pen Emomalı Rahmon kilemshe boıymen Qazaqstannyń Memlekettik týyna qaraı júrip ótti.
Tý aldyna kelgende Prezıdentter bas ıip, rámizge qurmet bildirdi. Sodan soń qaraýyl sapynyń boıymen júrdi.
Osydan keıin keńeıtilgen quramdaǵy kelissózder bastaldy. Onda taraptar strategııalyq áriptestik pen odaqtastyq qatynastardy nyǵaıtý máselelerin qarastyrady.
Aıta keteıik, 5-7 qarasha kúnderi Memleket basshysynyń shaqyrýymen elimizge Tájikstan Prezıdenti Emomalı Rahmonnyń resmı sapary ótip jatyr.
QR Syrtqy ister mınıstrliginiń habarlaýynsha, 2026 jylǵy qańtar-qyrkúıek aılarynda Qazaqstan men Tájikstan arasyndaǵy taýar aınalymy 29,5%-ǵa ósip, 1,15 mlrd dollardy qurady. Onyń ishinde eksport kólemi 33,3%-ǵa artyp, 1,07 mlrd dollarǵa jetken.
Qazaqstannan Tájikstanǵa negizinen bıdaı, tabıǵı gaz, alıýmınıı oksıdteri men gıdroksıdteri, bıdaı uny, arpa, makaron ónimderi, tsıanıdter, ystyqtaı ılektelgen qospasyz bolat shybyqtary, asbest jáne basqa da ónimder eksporttalady.
Al Qazaqstan Tájikstannan – mys kenderi men kontsentrattaryn, myrysh kenderi men kontsentrattaryn, qorǵasyn kenderi men kontsentrattary, qaǵaz ben kartonnan jasalǵan keńse taýarlaryn, ák, mıneraldy jáne gazdalǵan sýlar, órik, keptirilgen jemister men kókónister satyp alady.
Qazaqstanda Tájikstannyń 507-den astam kompanııasy jumys isteıdi, sondaı-aq eki eldiń birlesken 91 kásiporny tirkelgen.
Dýshanbe qalasynda «Báıterek» qazaq ulttyq mádenı ortalyǵy jumys isteıdi. Beıresmı derekter boıynsha, Tájikstanda shamamen 2 myń qazaq turady. Al Qazaqstandaǵy tájik dıasporasynyń sany 50 myń adamǵa jýyqtaıdy. Bul – elimizdegi jalpy halyq sanynyń 0,26%-yn quraıdy.
Bilim berý salasyndaǵy yntymaqtastyq ta damyp keledi. 2023 jyldan bastap Qazaqstannyń joǵary oqý oryndarynda tájik azamattarynyń bilim alýyna bólinetin kvota 100 orynǵa deıin ulǵaıtyldy. Qazir Qazaqstanda Tájikstannyń 400-ge jýyq azamaty, al Tájikstannyń joǵary oqý oryndarynda Qazaqstannyń 100-ge jýyq azamaty bilim alyp jatyr. Oǵan qosa, IT mamandyqtary boıynsha Tájikstannyń 100 jas mamany oqytylǵan.
Buǵan deıin Qasym-Jomart Toqaev Tájikstan prezıdentin elorda áýejaıynda qarsy alǵan.
Sondaı-aq E. Rahmon Astanada ótken Aqaba protsesi sammıtine qatysty. Bıylǵy sammıt «Jasandy ıntellekt salasyndaǵy qaýipsizdik» taqyrybyna arnalǵan.