Tájikstan Nıpah vırýsynyń aldyn alý úshin epıdemıologııalyq baqylaýdy kúsheıtti

ASTANA.KAZINFORM – Tájikstan qaýipti Nıpah vırýsynyń aldyn alý úshin el shekaralarynda sanıtarlyq-epıdemıologııalyq sharalardy kúsheıtti. Qazirgi ýaqytta vırýstyń taralý qaýpi joq, dep habarlaıdy Kazinform agenttigi.

Tájikstannyń densaýlyq saqtaý jáne áleýmettik qorǵaý mınıstri Jamolıddın Abdýllozoda Dýshanbe áýejaılarynda vırýstyń taralýyn boldyrmaý úshin qashyqtan tekseretin termometrler ornatylǵanyn habarlady. Bul qurylǵylar Úndistannan kelgen jolaýshylardy qosa alǵanda, barlyq jolaýshynyń jaǵdaıyn baqylaıdy. Vırýsty anyqtaý úshin Reseıden ákelingen dıagnostıkalyq synaqtar da qoldanylady.

– Nıpah vırýsynyń belgilerine joǵary temperatýra, bas aýrýy, álsizdik jatady. Eger mundaı belgiler anyqtalsa, adamdar dereý oqshaýlanyp, tıisti medıtsınalyq tekserýden ótedi, - dedi Tájikstannyń densaýlyq saqtaý mınıstri.

Ol Tájikstanda tropıkalyq jarqanattardyń keıbir túrleri tasymaldaıtyn vırýstyń taralýy úshin tabıǵı jaǵdaı joq ekenin atap ótti. 

Budan buryn Tájikstan áskerı dárigerler daıyndaýǵa kiriskenin jazǵanbyz.