Tájikstan men Qytaı Pamır arqyly tsıfrlyq dálizdi iske qosty
ASTANA. KAZINFORM — Tájikstan men Qytaı Dýshanbe — Horog — Qulma — Qarasý — Beıjiń baǵyty boıynsha tikeleı talshyqty-optıkalyq baılanys jelisin iske qosty, dep habarlaıdy Kazinform agenttiginiń Dýshanbedegi menshikti tilshisi.
Tájikstan Úkimetiniń Baılanys qyzmetiniń málimetinshe, Tájikstan men Qytaı arasyndaǵy halyqaralyq tsıfrlyq dálizdiń ashylý rásimi 17 qazanda Dýshanbede ótti.
Tájikstan aýmaǵyndaǵy talshyqty-optıkalyq baılanys jelisi Dýshanbe — Horog — Qulma baǵytymen 1010 shaqyrymǵa sozylyp jatyr. Onyń 435 shaqyrymdyq eń kúrdeli bóligi Taýly-Badahshan avtonomııalyq oblysynyń bıik taýly aýmaǵy arqyly ótedi. Al qytaıdyń baılanys jelisine qosylatyn torap teńiz deńgeıinen 4363 metr bıiktiktegi Qulma asýynda ornalasqan.
Qytaı aýmaǵyndaǵy jeliniń uzyndyǵy 6100 shaqyrymdy quraıdy. Jańa jeliniń bastapqy derekter ótkizý jyldamdyǵy sekýndyna 1 terabıtke jetedi. Aldaǵy jyldary bul kórsetkishti 10 terabıtke deıin arttyrý josparlanyp otyr.
— Tájikstan derekter tranzıtin damytý úshin zor múmkindikke ıe boldy. Onyń aýmaǵy arqyly Qytaı men Ortalyq Azııa elderi, al keleshekte Ońtústik Azııa memleketteri arasynda tsıfrlyq derekterdi tasymaldaýǵa bolady. Bul — kezekti baılanys jelisi ǵana emes, Tájikstannyń Tsıfrlyq Jibek jolyndaǵy tranzıttik rólin kúsheıtetin jańa baǵyt, — dep habarlady vedomstvo.
Jańa tsıfrlyq dáliz Tájikstannyń besinshi halyqaralyq baılanys arnasy boldy. Jobany iske qosý eldiń 2030 jylǵa deıingi ulttyq damý strategııasy men 2040 jylǵa deıingi baılanys salasyn damytý strategııasynda kózdelgen. Basty maqsattardyń biri — eldiń halyqaralyq baılanys baǵyttaryn keńeıtip, 2030 jylǵa qaraı halyqaralyq arnalar arqyly sekýndyna 2 terabıtke deıin derek tasymaldaýǵa qol jetkizý.
Buǵan deıin BUU Damý baǵdarlamasy Tájikstannyń damýyna 84 mln dollar bóletini habarlanǵan bolatyn.
