Tájikstan men Qytaı «máńgilik dostyq» týraly kelisimge qol qoıdy

Bul týraly Kazinform agenttiginiń Dýshanbedegi menshikti tilshisi habarlady.

Tájikstan prezıdentiniń baspasóz qyzmeti málimetinshe, joǵary deńgeıdegi kezdesýler men kelissózder qorytyndysynda eki el arasynda 31 jańa yntymaqtastyq qujaty rásimdelgen.

— Eki memleket basshysy — qurmetti Emomalı Rahmon men qurmetti Sı Tszınpın jańa dáýirdegi jan-jaqty yntymaqtastyq pen strategııalyq seriktestikti tereńdetý týraly Tájikstan Respýblıkasy men Qytaı Halyq Respýblıkasynyń birlesken málimdemesine, sondaı-aq eki el arasyndaǵy máńgilik dostyq, tatý kórshilik jáne yntymaqtastyq týraly kelisimge qol qoıdy. Bul qujattyń basty urany — «Máńgilik dos, eshqashan jaý emes», — dep habarlady Tájikstan prezıdentiniń baspasóz qyzmeti.

Qujat Dýshanbe men Beıjiń arasyndaǵy qarym-qatynasty jańa deńgeıge kóterýdi kózdeıdi.

Kelisim yntymaqtastyqtyń keń aýqymyn qamtıdy.

Atap aıtqanda, saıası konsýltatsııalar, saýda-ekonomıkalyq baılanystar, mádenı almasý jáne qaýipsizdik máseleleri qujatqa engizilgen.

Osyǵan deıin Tájikstan men Qytaı 8 mlrd dollardan astam somaǵa kelisimsharttarǵa qol qoıǵany týraly jazdyq.