Tájikstan men Qytaı 8 mlrd dollardan astam somaǵa kelisimsharttarǵa qol qoıdy
ASTANA. KAZINFORM — Tájikstan prezıdenti Emomalı Rahmon Beıjińge memlekettik sapary aıasynda qytaılyq kompanııalardyń ókilderimen kezdesti, dep habarlaıdy Kazinform agenttiginiń Dýshanbedegi menshikti tilshisi.
Tájikstan basshysy baspasóz qyzmetiniń málimetinshe, Emomalı Rahmon óz sózinde qolaıly ekonomıkalyq ahýal men eki eldiń iskerlik ortalary arasyndaǵy saýda jáne ınvestıtsııalyq yntymaqtastyqtyń nyǵaıýyn atap ótti.
Ol Qytaıdy Tájikstan úshin senimdi jáne negizgi seriktes dep atap, respýblıka ekonomıkasyna qytaılyq ınvestıtsııalar kólemi shamamen 6 mlrd dollarǵa jetkenin, onyń shamamen 3,5 mlrd dollary — tikeleı ınvestıtsııa ekenin atap ótti.
Kezdesý barysynda ol eldiń ınvestıtsııalyq múmkindikterin tanystyryp, qytaılyq bıznesti Tájikstandaǵy jobalarǵa belsendirek qatysýǵa shaqyrdy. Gıdroenergetıkalyq áleýet, mıneraldy qorlar, kólik dálizderin damytý, logıstıkalyq ortalyqtar qurý jáne aýyl sharýashylyǵy ónimderin óńdeýge erekshe nazar aýdaryldy.
— Kezdesý men kelissózden keıin Tájikstan men Qytaı kompanııalary arasynda 50-den astam yntymaqtastyq qujatyna qol qoıyldy. Olar Tájikstanǵa 8 mlrd dollardan astam ınvestıtsııa tartýǵa baǵyttalǵan, — dep habarlady TR prezıdentiniń baspasóz qyzmeti.
Osyǵan Tájikstan Qazaqstannan 1,3 mln tonnaǵa deıin astyq ımporttaýdy kózdeıtinin jazdyq.
Sondaı-aq ótken aıda «Qazaqstan men Tájikstan arasyndaǵy odaqtastyq qatynastar týraly shartty ratıfıkatsııalaý týraly» Zań maquldanǵany habarlandy.
