Tájikstan men Qyrǵyzstan arasyndaǵy memlekettik shekarany demarkatsııalaý 2027 jyly aıaqtalady
ASTANA. KAZINFORM – Tájikstan Qyrǵyzstanmen memlekettik shekarany demarkatsııalaý jumystaryn 2027 jyly tolyq aıaqtaýdy josparlap otyr, dep habarlaıdy Kazinform agenttiginiń Dýshanbedegi menshikti tilshisi.
Tájikstannyń Jer resýrstaryn basqarý jáne geodezııa jónindegi memlekettik komıtetiniń tóraǵasy Orıf Hodjazoda baspasóz máslıhatynda uzyndyǵy 416 shaqyrym bolatyn ýchaskede dalalyq zertteý jumystary júrgizilgenin aıtty. Qazirgi ýaqytta 300 shaqyrym aýmaqta ınjenerlik jumystar aıaqtalǵan. Bul jalpy jumystyń 90 paıyzy.
Onyń aıtýynsha, Qyrǵyzstanmen memlekettik shekarany demarkatsııalaý jumystary 2027 jyly tolyq aıaqtalmaq.
Sonymen qatar, Ózbekstanmen de belsendi jumys júrgizilip jatyr. Jyl basynan beri memlekettik shekarany demarkatsııalaý máseleleri jónindegi úkimetaralyq jumys toptary aıasynda Tájikstan men Ózbekstan delegatsııalarynyń jeti kezdesýi ótken.
Tájikstan men Qyrǵyzstan arasyndaǵy memlekettik shekaranyń jalpy uzyndyǵy – 1008,14 shaqyrym. Eki el memlekettik shekara týraly kelisimge 2025 jylǵy 13 naýryzda Bishkekte qol qoıǵan.
Al 2025 jylǵy 31 naýryzda Hýdjand qalasynda Tájikstan, Ózbekstan jáne Qyrǵyzstan basshylary úsh el shekaralarynyń túıisý núktesi týraly kelisimge jáne odaqtastyq týraly sharttyń ratıfıkatsııalyq gramotalarymen almasý hattamasyna qol qoıdy. Hýdjand deklaratsııasyna qol qoıý óńir elderi arasyndaǵy tatý kórshilik pen ózara túsinistikti nyǵaıtýǵa berik negiz qalady.
Buǵan deıin Qyrǵyzstan, Tájikstan jáne Ózbekstan shekaralary túıisken jerde alǵashqy shekara baǵandary ornatylǵany habarlanǵan bolatyn.
