Tájikstan ІІM balger, emshi, sıqyrshy, jalǵan moldalardyń tizimin jasap jatyr
ASTANA. KAZINFORM — Tájikstan Іshki ister mınıstrligi balgerler, sıqyrshylar, jezóksheler, nashaqorlar jáne alaıaqtyq áreketterge qatysy bar basqa da tulǵalar týraly aqparatty qamtıtyn arnaıy derekqor qurý ústinde, dep habarlaıdy Kazinform agenttiginiń Dýshanbedegi menshikti tilshisi.
— Yrymshyldyqtyń, balgerliktiń, sıqyrshylyqtyń jáne aldaýmen baılanysty basqa da áreketterdiń aldyn alý maqsatynda balgerler, sıqyrshylar, kezbe jalǵan moldalar, jezóksheler, olardyń klıentteri men týystary, nashaqorlar jáne osy áreketterge qatysy bar basqa da adamdardyń esimderi Іshki ister mınıstrliginiń arnaıy derekqoryna engizilip jatyr. Bul adamdar únemi baqylaýda, — dep málimdedi Tájikstan ІІM baspasóz qyzmeti.
Mınıstrliktiń málimetinshe, derekqordaǵy aqparat tıisti organdardyń suranysy boıynsha beriledi. Mınıstrlik azamattardy «arnaıy baqylaý tizimine engizilip balalarynyń aldynda uıatqa qalmaý úshin» osy sanattaǵy adamdardan boıyn aýlaq ustaýǵa shaqyrady.
Buǵan deıin Tájikstannyń ishki ister mınıstri Ramazan Rahımzoda 2026 jyldyń basynda 5000-nan astam balger, sıqyrshy jáne «qańǵyp júrgen jalǵan molda» tirkelgenin habarlaǵan bolatyn. Dýshanbe qalalyq ishki ister basqarmasynyń málimeti boıynsha, 2026 jyldyń birinshi jartysynda el astanasynda balgerlikpen aınalysýdyń 93 deregi anyqtaldy. Taǵy 11 azamatqa balger qyzmetin paıdalanǵany úshin aıyppul salynǵan.
Tájikstanda balgerlik pen sıqyrshylyq etkeni úshin 100 eseptik kórsetkishke deıin aıyppul nemese 15 táýlikke deıin ákimshilik qamaq jazasy belgilengen. Osy áreketter bir jyl ishinde qaıtalansa, eki jylǵa deıin bas bostandyǵynan aıyrý jazasyna ákep soǵady.
Eske sala keteıik, Tájikstanda balgerlerdiń qyzmetine júgingenderge aıyppul salý máselesi byltyr qozǵalǵan.
Sondaı-aq Tájikstan 16 jasqa tolmaǵan balalardyń áleýmettik jelige kirýine shekteý qoıýy múmkin.
Qyzǵaldaq pen báısheshek Tájikstannyń ulttyq gúlderi bolyp jarııalandy.
