Tájikstan Qazaqstannan 1,3 mln tonnaǵa deıin astyq ımporttaýdy kózdeıdi
ASTANA. KAZINFORM — «Azyq-túlik kelisimshart korporatsııasy» aktsıonerlik qoǵamy men Tájikstan Respýblıkasy Úkimeti janyndaǵy Memlekettik materıaldyq rezervter agenttigi azyq-túlik jetkizý salasyndaǵy yntymaqtastyqty nyǵaıtýǵa ýaǵdalasty, dep habarlaıdy AShM baspasóz qyzmeti.
Bul týraly taraptar Astanada ótken kezdesýde málimdeı kelip, Qazaqstannyń Tájikstanǵa dástúrli bıdaı men unnyń negizgi jetkizýshisi ekenin atap ótti. Bul elde ishki óndiris qajettiliktiń 40%-yn ǵana qamtıdy. Byltyrǵy jyly qazaqstandyq bıdaı tasymaly 1,2 mln tonnaǵa jetti, bul sońǵy bes jyldaǵy rekordtyq kórsetkish deýge bolady.
Tájikstannyń Memlekettik materıaldyq rezervter agenttiginiń dırektory Nýrmahmad Ahmadzodanyń aıtýynsha, aǵymdaǵy maýsymda 1,3 mln tonnaǵa deıin astyq ónimderin ımporttaýdy josparlap otyr.
— Bizdiń yntymaqtastyǵymyzdyń bolashaǵy zor, óıtkeni azyq-túlik qaýipsizdigi kez kelgen memleket úshin árqashan aldyńǵy orynda turady. Biz tek astyq qana emes, sonymen qatar un men kúnbaǵys maıyn jetkizýge de múddelimiz, — dedi Nýrmahmad Ahmadzoda.
Sondaı-aq korporatsııa ókilderin Dýshanbe qalasynda astyq saqtaý ınfraqurylymymen tanysýǵa jáne jańa elevatorlar men qaıta óńdeý kásiporyndaryn salýǵa qatysý múmkindigin qarastyrýǵa shaqyrdy.
Óz kezeginde «Azyq-túlik kelisimshart korporatsııasy» aktsıonerlik qoǵamy basqarma tóraǵasynyń birinshi orynbasary Ildar Ismagýlov yntymaqtastyqty keńeıtýge daıyn ekenin jetkizdi.
— Korporatsııa atalǵan agenttikpen uqsas azyq-túlik qaýipsizdigin qamtamasyz etýge baǵyttalǵan strategııalyq qyzmetterdi júzege asyrady. Bizdiń seriktestigimiz ýaqyt synynan ótken jáne ózara senim men ortaq mindetterge negizdelgen. Biz óz tarapymyzdan jetkizýdiń qolaıly tetikterin usynyp, Tájikstanǵa astyq pen tıisti azyq-túlik qajettiligin qamtamasyz etýge daıynbyz, — dedi kompanııa ókili.
Kezdesý qorytyndysynda qos tarap uzaq merzimdi yntymaqtastyqty qoldaı otyryp, aldaǵy ýaqytta astyq jetkizý boıynsha kelisimshartqa qol qoıý máselesin taǵy bir márte pysyqtamaq. Bul kelisimderdiń júzege asýy Ortalyq Azııa óńirindegi azyq-túlik júıeleriniń turaqtylyǵyn nyǵaıtýǵa yqpal etedi.
Buǵan deıin Senattyń jalpy otyrysynda «Qazaqstan men Tájikstan arasyndaǵy odaqtastyq qatynastar týraly shartty ratıfıkatsııalaý týraly» Zań maquldanǵanyn jazdyq.
