Tájikstan qazaqstandyqtarǵa 100 bilim grantyn bóldi
ASTANA. KAZINFORM – Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy bilim berý salasyndaǵy yntymaqtastyq týraly kelisim sheńberinde 2025–2026 oqý jylyna Tájikstannyń joǵary oqý oryndarynda oqý úshin 100 bilim granty bólindi.
Granttar myna baǵdarlamalar boıynsha usynylady:
-
bakalavrıat – 70 oryn;
-
magıstratýra – 20 oryn;
-
úzdiksiz ıntegratsııalanǵan medıtsınalyq bilim berý baǵdarlamasy – 10 oryn.
Oqý tili – tájik nemese orys tili.
- Grant tegin oqýdy, memlekettiń ulttyq zańnamasyna sáıkes aı saıynǵy stıpendııany jáne medıtsınalyq qyzmet kórsetýdi qamtıdy. Qalǵan shyǵyndar, sonyń ishinde jolaqy jáne turý aqysy, grant ıegeriniń jeke qarajaty esebinen tólenedi, - delingen Halyqaralyq baǵdarlamalar ortalyǵynyń aqparatynda.
Qujattar 2025 jylǵy 12 tamyzǵa deıin qabyldanady. Tolyq aqparat bolashak.gov.kz saıtynda jarııalanǵan.
Aıta keteıik, bıyl Qazaqstan men Tájikstan bilim jáne ǵylym salasynda áriptestikti keńeıtý jóninde birqatar kelisimge qol qoıǵan bolatyn.
Jaqynda Astanada Qazaqstan men Tájikstan arasyndaǵy Úkimetaralyq komıssııanyń 19-otyrysy ótti.