Tájikstan, Iran jáne Aýǵanstan birlesken kólik dálizin iske qosady
ASTANA. KAZINFORM — Tájikstan, Iran jáne Aýǵanstan birlesken avtomobıl kóligi dálizin iske qosý týraly kelisimge keldi. Bul týraly Kazinform agenttiginiń Dýshanbedegi menshikti tilshisi habarlady.
Tájikstan Kólik mınıstrliginiń málimetinshe, tıisti kelisimge shilde aıynyń ortasynda Irannyń Meshhed qalasynda ótken úsh el ókilderiniń kezdesýiniń qorytyndysy boıynsha qol qoıylǵan.
Jańa kólik dálizi Tájikstan men Irannyń kommertsııalyq júkterin Aýǵanstan aýmaǵy arqyly tasymaldaýǵa múmkindik beredi. Alǵashqy synaq júk tasymaly aldaǵy bir aı ishinde júzege asyrylady dep josparlanyp otyr. Bul shekaralyq, kedendik jáne kólik rásimderiniń tıimdiligin tekserýge, sondaı-aq tıisti qyzmetterdiń ózara is-qımylyn baǵalaýǵa múmkindik beredi.
Jobany júzege asyrý úshin turaqty jumys isteıtin úshjaqty jumys toby quryldy. Ol yqtımal kedergilerdi joıýmen, qol jetkizilgen kelisimderdiń oryndalýyn baqylaýmen jáne kólik baǵytyn odan ári damytý jóninde usynystar ázirleýmen aınalysady.
Bolashaqta bul avtomobıl kóligi dálizin Ortalyq Azııanyń ózge elderi men Qytaıǵa deıin keńeıtý josparlanyp otyr.
Eske sala keteıik, buǵan deıin Qazaqstan men Iran kólik-logıstıkalyq termınal salý jónindegi kelisimge qol qoıǵanyn jazdyq.
