Tájikstan ekonomıkasy 8,2%-ǵa ósti
ASTANA. KAZINFORM — 2026 jyldyń birinshi jartyjyldyǵynda Tájikstannyń jalpy ishki ónimi (JІÓ) 8,8 mlrd AQSh dollaryna jetip, ekonomıkanyń ósý qarqyny 8,2%-dy qurady, dep habarlaıdy Kazinform agenttiginiń Dýshanbedegi menshikti tilshisi.
Baspasóz máslıhatynda Tájikstannyń Ekonomıkalyq damý jáne saýda mınıstri Abdýrahmon Abdýrahmonzoda jahandyq jáne óńirlik kúrdeli syn-qaterlerge qaramastan, 2026 jyldyń alǵashqy alty aıynda ulttyq ekonomıka oń ósim kórsetkenin aıtty.
— Jalpy ishki ónimniń naqty ósimi 8,2%-dy qurady. Onyń kólemi 81,7 mlrd somonıge jetti. Bul ótken jyldyń sáıkes kezeńimen salystyrǵanda 10,8 mlrd somonıge artyq, — dedi mınıstr.
Onyń aıtýynsha, ulttyq ekonomıkanyń ósimi negizinen ónerkásip óndirisiniń 14,1%-ǵa, aýyl sharýashylyǵynyń 7,2%-ǵa, aqyly qyzmet kórsetý kóleminiń 10,6%-ǵa, ınvestıtsııalardyń 18,4%-ǵa, taýar aınalymynyń 26,1%-ǵa, júk tasymalynyń 14,7%-ǵa jáne jolaýshylar tasymalynyń 8%-ǵa ulǵaıýy esebinen qamtamasyz etilgen.
— Inflıatsııa deńgeıi 2,4%-dy qurady. Bul ótken jyldyń sáıkes kezeńimen salystyrǵanda 0,6 paıyzdyq tarmaqqa joǵary. Osy kezeńdegi ınflıatsııa negizinen azyq-túlik taýarlary baǵasynyń 2,6%-ǵa, azyq-túlikke jatpaıtyn taýarlar baǵasynyń 1,7%-ǵa jáne qyzmet kórsetý baǵasynyń 3,8%-ǵa ósýine baılanysty boldy, — dedi Abdýrahmon Abdýrahmonzoda.
Buǵan deıin habarlanǵandaı, 2026 jyldyń alǵashqy jartysynda Tájikstanda bolǵan tabıǵı sıpattaǵy tótenshe jaǵdaılar el ekonomıkasyna 52,8 mln somonı (shamamen 5,7 mln AQSh dollary) kóleminde shyǵyn keltirgeni belgili.
