Tájikstan ekonomıkasy 2025 jyly 8,4%-ǵa ósti

ASTANA. KAZINFORM — Tájikstan prezıdenti Emomalı Rahmonnyń tóraǵalyǵymen ótken Úkimettiń keńeıtilgen otyrysynda eldiń 2025 jylǵy áleýmettik-ekonomıkalyq damý qorytyndylary shyǵarylyp, 2026 jylǵa arnalǵan basym mindetter aıqyndaldy, dep habarlaıdy Kazinform menshikti tilshisi.

Úkimet otyrysynda sóz sóılegen premer-mınıstr Kohır Rasýlzoda jahandyq syn-qaterlerge qaramastan, 2025 jyl Tájikstan úshin tabysty bolǵanyn atap ótti.

— Esepti kezeńde jalpy ishki ónim kólemi 176,9 mlrd somonıdi (shamamen $19 mlrd) qurady. Ekonomıkalyq ósim qarqyny 8,4% deńgeıinde qamtamasyz etildi. Inflıatsııa deńgeıi 3,5% boldy, — dedi ol.

2025 jyly memlekettik bıýdjetke 60,3 mlrd somonı (shamamen $6,48 mlrd) tústi, bul josparlanǵan kórsetkishten 7 mlrd somonıge artyq. Sondaı-aq 59,5 mlrd somonı ($6,3 mlrd) kóleminde sheteldik ınvestıtsııa tartylyp, bul 2024 jylmen salystyrǵanda 35%-ǵa artty. Jalpy taýar aınalymynyń kólemi 14%-ǵa ósip, 77,3 mlrd somonıdi ($8,31 mlrd) qurady.

Elde 400 jańa ónerkásip kásiporny, 38 balabaqsha, 214 jalpy bilim beretin mektep, 113 densaýlyq saqtaý nysany paıdalanýǵa berildi. Sonymen qatar 280 myń jańa jumys orny quryldy.

2025 jyldyń qorytyndysyn shyǵara otyryp, prezıdent Emomalı Rahmon Úkimetke strategııalyq maqsattarǵa qol jetkizý jáne eldiń ekonomıkalyq ósimin keminde 8% deńgeıinde qamtamasyz etý úshin jumysty jandandyrýdy tapsyrdy.

Osydan buryn Tájikstan Respýblıkasynyń basshysy eldiń kúshtik qurylymdarynda kadrlyq ózgerister jasaǵany belgili boldy.