Tájikstan balalarǵa 14 jasqa deıin áleýmettik jelini paıdalanýǵa tyıym salmaq

ASTANA. KAZINFORM — Tájikstan parlamentiniń depýtaty Dılnoza Ahmadzoda áleýmettik jelilerdi paıdalaný úshin jas shekteýin engizýdi usyndy, dep habarlaıdy Kazinform agenttiginiń menshikti tilshisi ASIA-Plus-qa silteme jasap.

Ol 14 jasqa deıingi kámeletke tolmaǵandarǵa áleýmettik jelilerge tolyq tyıym salýdy, al 14 pen 17 jas aralyǵyndaǵy jasóspirimderge – tek ata-anasynyń jazbasha kelisimimen paıdalanýǵa ruqsat berýdi usyndy.

Depýtattyń pikirinshe, ınternet pen áleýmettik jelilerdi shekten tys paıdalaný balalardyń psıhıkalyq jáne rýhanı damýyna keri áser etýi múmkin.

Ol bıyl el úkimeti «Bala quqyǵyn qorǵaý týraly» zańǵa jalǵan jáne zııandy aqparatqa qatysty birqatar ózgerister engizgenin atap ótti. Degenmen, zańǵa balalar men jasóspirimderdiń áleýmettik jelilerdi paıdalanýyn baqylaýǵa alýǵa múmkindik beretin qosymsha túzetýler qajet ekenin aıtty.

Sarapshylar áleýmettik jelilerge tolyq tyıym salý máseleni sheshpeıtinin, bul máselede saqtyq pen jan-jaqty tásildiń qajet ekenin alǵa tartady. Olardyń pikirinshe, jastarǵa tsıfrlyq gıgıena erejelerin úıretý, synı oılaý qabiletin damytý jáne aǵartýshylyq jumystardy kúsheıtý mańyzdy.

Aıta keteıik, Aýstralııada 16 jasqa tolmaǵan balalarǵa YouTube akkaýnttaryna kirýge tyıym salynady.