Tájikstan astanasyndaǵy barlyq kásiporynǵa kún batareıalary ornatylmaq
ASTANA. KAZINFORM — Tájikstan bıligi el astanasyndaǵy kásiporyndardy jappaı kún energııasyna kóshirýdi bastap jatyr, dep habarlaıdy Kazinform agenttiginiń Dýshanbedegi menshikti tilshisi.
Dýshanbe qalasynyń meri Rýstam Emomalı osyndaı ókim shyǵardy. Salalyq mekemelerge menshik túrine qaramastan, qaladaǵy barlyq kásiporyndarǵa panelderdi ornatýdy qamtamasyz etý tapsyryldy.
Buǵan deıin astana bıligi barlyq jańa kópqabatty ǵımarattarǵa, ýnıversıtetterge jáne bilim berý mekemelerine kún batareıalaryn ornatýdy mindettegen bolatyn. 2024 jyldyń sáýirinen bastap osyndaı 1530 jobaǵa saraptama jasaldy.
Qazir Tájikstanda Kún energııasyn óndirý damyp keledi. Úkimet jalpy qýaty 500 MVt bolatyn eki kún elektr stantsııasyn salýǵa arnalǵan ınvestıtsııalyq kelisimge qol qoıdy. Olar Soǵdy oblysynyń Asht aýdanynda jáne Hatlon oblysynyń Djeıhýn aýdanynda salynbaq.
Tájikstannyń 2023–2037 jyldarǵa arnalǵan «Jasyl ekonomıkany damytý strategııasyn» iske asyrý aıasynda úkimet jańartylatyn energııa kózderiniń qýatyn 10 myń MVt-qa deıin arttyryp, 2037 jylǵa qaraı taza, shyǵaryndysyz elektr energııasyn óndirýge tolyq kóshýdi kózdep otyr.
Buǵan deıin Tájikstan men Qytaı Pamır taýlary arqyly ótetin halyqaralyq tsıfrlyq dálizdi iske qosqany habarlanǵan bolatyn.
