Tájikstan astanasynda 340 metrlik záýlim ǵımarat boı kóteredi
ASTANA. KAZINFORM — Tájikstan astanasy Dýshanbede Ortalyq Azııadaǵy eń bıik ǵımarattyń qurylysy bastaldy, dep habarlaıdy Dýshanbedegi Kazinform agenttiginiń menshikti tilshisi.
Tájikstan prezıdentiniń baspasóz qyzmetiniń málimetinshe, 3 qyrkúıekte Tájikstan prezıdenti Emomalı Rahmon men Senat spıkeri, Dýshanbe qalasynyń meri Rýstamı Emomalı elordadaǵy Shohmansýr aýdanynda kópfýnktsıonaldy sáýlet-servıstik kesheniniń qurylysyn bastaý rásimine qatysty.
Sáýlet kesheni 29 gektar aýmaqty alyp, 52 nysandy qamtıdy. Onyń ishinde 5 bıik munara bolady. Eń bıik munara 77 qabattan turyp, bıiktigi 340 metrge jetedi. Oǵan «Dýshanbe munarasy» ataýy berilmek.
Keshen quramyna qonaqúı, kafe, meıramhanalar, saýda jáne qyzmet kórsetý oryndary, keńse ǵımarattary, 1000 oryndyq kontsert zaly, kınoteatr, saýda-oıyn-saýyq ortalyǵy, balalar oıyn alańy, túrli is-sharalar ótkizýge arnalǵan abattandyrylǵan aýmaq, sport zaly, saıabaq jáne kól kiredi.
Ǵımarattardyń syrtqy kelbeti álemdik brendterdiń talaptaryna saı bolady.
Joba aıasynda 6160 páterge arnalǵan 42 turǵyn úı, 1200 oqýshyǵa arnalǵan jalpy bilim beretin mektep jáne 500 balaǵa arnalǵan balabaqsha salynady.
Qurylys jumystaryn 5 jyl ishinde aıaqtaý josparlanyp otyr. Jobaǵa 2 myńnan astam jergilikti qurylysshy tartylmaq.
Qazirgi ýaqytta Ortalyq Azııadaǵy eń bıik ǵımarat Astanadaǵy «Abý-Dabı Plaza» kópfýnktsıonaldy kesheniniń munarasy sanalady. Onyń bıiktigi 311 metr, al ǵımarat 75 qabattan turady.
Buǵan deıin Tájikstan 2030 jylǵa deıin týrıstik salany damytýǵa 29,5 mln dollar baǵyttaıtyny habarlanǵan bolatyn.
