Tájikstan 2035 jylǵa qaraı parnıktik gaz shyǵaryndylaryn 15 paıyzǵa azaıtpaq
ASTANA. KAZINFORM — Tájikstan 2035 jylǵa deıingi jańartylǵan klımattyq josparyn BUU-ǵa joldady. Qujatqa sáıkes, el parnıktik gaz shyǵaryndylaryn 15 paıyzǵa, al halyqaralyq qoldaý bolsa, 40 paıyzǵa deıin qysqartýdy kózdep otyr. Bul týraly Kazinform agenttiginiń Dýshanbedegi menshikti tilshisi habarlady.
Qujatta Tájikstan 2030 jylǵa qaraı parnıktik gaz shyǵaryndylaryn 1990 jylǵy deńgeımen salystyrǵanda 10 paıyz, al 2035 jylǵa qaraı 15 paıyz azaıtýdy josparlaǵan. Halyqaralyq qarjylyq jáne tehnologııalyq qoldaý kórsetilgen jaǵdaıda bul kórsetkishter tıisinshe 25 jáne 40 paıyzǵa jetýi múmkin.
«Ulttyq deńgeıde aıqyndalatyn úles» (ONÝV 3.0) qujatyn respýblıka úkimeti 2026 jylǵy 16 qazanda bekitken.
Tájikstannyń Qorshaǵan ortany qorǵaý komıtetiniń tóraǵasy Bahodýr Sheralızoda qujattyń bekitilýi naqty jumystyń bastamasy ǵana ekenin aıtty. Onyń sózinshe, klımattyq maqsattar salalyq baǵdarlamalar men óńirlik josparlarǵa engizilýi kerek. Al klımat saıasatynyń nátıjesi qabyldanǵan qujattardyń sanymen emes, ekonomıka men halyqtyń ómirine tıgizgen naqty áserimen baǵalanýǵa tıis.
2026-2035 jyldarǵa arnalǵan ONÝV 3.0 sharalaryn iske asyrýǵa qajetti qarjy kólemi tańdalǵan stsenarııge qaraı 20-22,5 mlrd dollar aralyǵynda baǵalanyp otyr.
Ulttyq deńgeıde aıqyndalatyn úlester — Parıj kelisiminiń negizgi tetikteriniń biri. Kelisimge qatysýshy elder ár bes jyl saıyn parnıktik gaz shyǵaryndylaryn azaıtý jáne klımattyń ózgerýine beıimdelý jónindegi mindettemelerin jańartyp, maqsattaryn kúsheıtip otyrady.
Eske salaıyq, buǵan deıin Qazaqstanda parnıktik gazdar shyǵaryndylaryna qatysty jańa erejeler engizilgenin jazǵanbyz.