Tájikstan 2035 jylǵa qaraı parnıktik gaz shyǵaryndylaryn 15%-ǵa qysqartýdy josparlap otyr

ASTANA. KAZINFORM – Tájikstan 2035 jylǵa qaraı parnıktik gaz shyǵaryndylaryn 15%-ǵa, al halyqaralyq qoldaý bolǵan jaǵdaıda 40%-ǵa deıin qysqartýdy kózdep otyr. Bul maqsattar eldiń jańartylǵan ulttyq deńgeıde aıqyndalatyn úlesi (ONÝV 3.0) qujatynda bekitilgen.

vybrosy parnıkovyh gazov
Foto: pexels

Qujatqa sáıkes, Tájikstan 1990 jylǵy deńgeımen salystyrǵanda parnıktik gaz shyǵaryndylaryn 2030 jylǵa qaraı 10%-ǵa, 2035 jylǵa qaraı 15%-ǵa azaıtýdy josparlaǵan.

Al halyqaralyq qarjylyq jáne tehnologııalyq qoldaý kórsetilgen jaǵdaıda bul kórsetkishter tıisinshe 25% jáne 40%-ǵa jetýi múmkin.

ONÝV 3.0 qujatyn Tájikstan úkimeti 2026 jylǵy 16 qazanda bekitken.

Tájikstannyń Qorshaǵan ortany qorǵaý komıtetiniń tóraǵasy Bahodýr Sheralızoda qujattyń qabyldanýy naqty jumystardyń bastamasy ǵana ekenin atap ótti.

Onyń aıtýynsha, klımattyq maqsattar salalyq baǵdarlamalar men óńirlik damý josparlarynda kórinis tabýy tıis.

– Qujatty bekitý – praktıkalyq jumystyń bastamasy ǵana. Klımattyq maqsattar salalyq baǵdarlamalar men óńirlik josparlarda qamtylýy qajet. Klımat saıasatynyń tabystylyǵy qabyldanǵan qujattardyń sanymen emes, ekonomıka men halyq úshin qol jetkizilgen naqty nátıjelermen baǵalanýy tıis, – dedi Bahodýr Sheralızoda.

Esepteýlerge sáıkes, 2026-2035 jyldary klımattyq sharalardy júzege asyrý úshin Tájikstanǵa tańdalǵan stsenarııge baılanysty 20-22,5 mlrd dollar qajet bolady.

Ulttyq deńgeıde aıqyndalatyn úlester Parıj klımat kelisiminiń negizgi tetikteriniń biri sanalady.

Kelisim aıasynda memleketter ár bes jyl saıyn parnıktik gaz shyǵaryndylaryn azaıtý jáne klımattyń ózgerýine beıimdelý jónindegi mindettemelerin jańartyp, maqsattaryn kúsheıtip otyrady.

Aıta keteıik, buǵan deıin Tájikstandaǵy muzdyqtardyń erýi Ortalyq Azııanyń sý qaýipsizdigine qaýip tóndirip otyrǵany habarlanǵan edi. Sarapshylardyń boljamynsha, 2050 jylǵa qaraı eldegi muzdyqtar taǵy 20%-ǵa deıin qysqarýy múmkin.