Tájikstan 2030 jylǵa qaraı kásipkerler sanyn 500 myńǵa jetkizýdi josparlap otyr
ASTANA. KAZINFORM- Tájikstanda 2030 jylǵa qaraı kásipkerlik sýbektileriniń sanyn 500 myńǵa jetkizý josparlanyp otyr, dep habarlaıdy Kazinform agenttiginiń Dýshanbedegi menshikti tilshisi.
Tıisti tapsyrmany Tájikstan prezıdenti Emomalı Rahmon Kásipkerler kúnine oraı eldiń bıznes ókilderimen jáne ınvestorlarymen kezdesýde berdi.
— Qazir elimizde 395 myń kásipkerlik sýbektisi jumys isteıdi. Bul ótken jyldyń sáıkes kezeńimen salystyrǵanda 20 myńǵa kóp. Biz aldymyzǵa 2030 jylǵa qaraı olardyń sanyn keminde 500 myńǵa jetkizý maqsatyn qoıdyq, — dedi Emomalı Rahmon.
Ol kásipkerler sanyn arttyrýmen qatar, olardyń qyzmetiniń turaqty bolýyna, óndiris pen ınnovatsııaǵa baǵdarlanýyna jáne jańa jumys oryndaryn kóbirek ashýyna mán berý qajet ekenin atap ótti. Osyǵan baılanysty óńdelgen ónim eksportyn eki ese arttyrý jáne bankterdiń nesıe portfelindegi óndiristik maqsatqa beriletin kredıtterdiń úlesin 40 paıyzdan asyrý josparlanyp otyr.
Tájikstan prezıdenti shaǵyn jáne orta bızneske júrgiziletin tekserýlerge salynǵan moratorııdi salyqtyq tekserýlerdi qospaǵanda, 2029 jylǵy 1 qańtarǵa deıin uzartatynyn málimdedi.
Onyń aıtýynsha, jeke sektor eldiń jalpy ishki óniminiń jáne jumyspen qamtylýynyń 70 paıyzyn, sondaı-aq salyq túsimderiniń 80 paıyzdan astamyn qamtamasyz etedi. Kásipkerlerge 240-tan astam túrli kepildik pen jeńildik berilgen.
Prezıdent tapsyrmalarynyń qatarynda 2027 jyldyń sońyna deıin tirkeý, ruqsat berý jáne lıtsenzııalaý boıynsha negizgi qyzmetterdi tolyq elektrondyq formatqa kóshirý bar.
Sonymen qatar úkimetke 20 myńnan astam jeke kásipkerdiń jalpy somasy 120 mıllıon somonıden asatyn salyq bereshegin esepten shyǵarý jóninde usynystar ázirleý tapsyryldy.
Osyǵan deıin Tájikstanda jalaqy, zeınetaqy jáne shákirtaqy óskeni týraly jazdyq.
