Tájikstan 12 jyldyq bilim berý júıesine kóshýdi josparlap otyr

ASTANA.KAZINFORM — Tájikstan prezıdenti Emomalı Rahmon úkimetke 12 jyldyq bilim berý júıesine kóshý úshin qajetti sharalardy qabyldaýdy tapsyrdy, dep habarlaıdy Kazinform agenttiginiń menshikti tilshisi.

Bıylǵy joldaýynda ol Tájikstannyń bilim berý júıesin biryńǵaı halyqaralyq keńistikke tez ıntegratsııalaý maqsatynda el astanasyndaǵy joǵary oqý oryndary úshin kredıttik júıege kóshý 2004 jyly bastalǵanyn, al 2014 jyly osy oqý oryndarynyń barlyǵy atalmysh júıege aýystyrylǵanyn atap ótti. Sondyqtan bul júıeniń artyqshylyǵy men kemshilikterin taldap, baǵalaý ýaqyty keldi.

— Taldaýǵa sáıkes, aldaǵy 25 jylda Tájikstandaǵy stýdentter sany tórt mıllıonǵa jetedi. Sondyqtan biz qazir kóbirek muǵalimderdi daıarlaý, bilim berý mekemelerin salý jáne bilim berý júıesin halyqaralyq standarttarǵa sáıkestendirý, ıaǵnı 12 jyldyq bilim berý júıesine kóshý úshin sharalar qabyldaýymyz kerek, — dep atap ótti Emomalı Rahmon.

Ol el úkimetine 2030 jylǵa deıingi Ulttyq bilim berýdi damytý strategııasyn iske asyrýdy keshendi túrde qarastyrýdy jáne ony jańa maqsattarǵa sáıkes jetildirýdi tapsyrdy.

— Biz memleket pen ulttyń bolashaǵy bilimdi, saýatty, óz mamandyǵyn jetik meńgergen, bilimi men mádenıeti jetkilikti, fanatızmnen ada, patrıotızm rýhynda tárbıelengen jáne ulttyq sezimi myqty urpaqqa tikeleı baılanysty ekenin este ustaýymyz kerek, — dedi Tájikstan basshysy.

Biz buǵan deıin Tájikstanda aldaǵy bes jylda 1,4 mıllıon jumys orny qurylatyny týraly habarlaǵan edik.