Tájik sarbazy qazaqtyń kókparyn álemdik arenada dáriptep júr
ASTANA. KAZINFORM — «Shyǵys» óńirlik qolbasshylyǵyna qarasty áskerı bólimderde ártúrli ult ókilderi Otan aldyndaǵy boryshyn abyroımen atqaryp keledi. Solardyń biri — Ulttyq ulannyń 6699 áskerı bóliminde merzimdi qyzmetin ótep júrgen qatardaǵy jaýynger Abýbakr Kýchakov. Bul týraly Ulttyq ulannyń baspasóz qyzmeti málim etti.
Ol tek áskerı tártippen ǵana emes, sporttaǵy jetistikterimen de qarýlastary arasynda erekshe qurmetke ıe. Tájik ultynyń ókili Abýbakr kókparǵa mektep qabyrǵasynan bastap qyzyǵyp, bul sportta eleýli jetistikterge jetken. 2024 jyly Astanada ótken V Dúnıejúzilik kóshpendiler oıyndarynda Qazaqstan ulttyq quramasynyń sapynda óner kórsetip, kókpardan jeńimpaz atanǵan.
— Kókparda qorǵanys shebinde oınadym. Qazandyqqa salym saldyrmaı, qarsylastyń jolyn bógeý úshin tek kúsh emes, astyndaǵy attyń eptiligi de sheshýshi ról atqarady. «Snıkers» pen «Qulager» atty tulparlarym meni eshqashan jerge qaratqan emes. Jalpy, kókpar oıyny túrki halyqtaryna ortaq oıyn. Qazaqstanǵa qonys aýdarǵan atam da tájik elinde atqa minip, kókpar tartatynbyz dep jıi aıtatyn, — deıdi qatardaǵy jaýynger.
Túrkistan oblysy Maqtaral aýdany Ferdaýsı aýylynyń týmasy qazaq tilinde erkin sóıleıdi. Qatardaǵy jaýynger ulttyq sporttyń jastar arasynda keńinen dáriptelýine ózindik úlesin qosýda. Abýbakr áskerden keıin jylqy baptap, tájirıbe jınap, alda bolatyn jarystarda baǵyn synap kórmek. Qazirgi ýaqytta sarbaz Óskemen qalasyndaǵy túzeý mekemelerinde qoǵamdyq tártip pen qaýipsizdikti qamtamasyz etýde. Aıta keteıik, 6699 áskerı bóliminde onǵa jýyq ózge ult ókilderi merzimdi áskerı qyzmetin ótkerip jatyr.
Aıta keteıik, buǵan deıin Ulttyq ulanda 100-ge jýyq kúıdi jatqa biletin sarbaz áskerı mindetin ótep júrgenin jazǵan edik.
