Tájik-aýǵan shekarasynda taǵy da atys boldy: úsh kontrabandashynyń kózi joıyldy

ASTANA. KAZINFORM – 29 qańtarda bes aýǵan kontrabandashysy Tájikstan shekarasynan zańsyz ótti, onyń úsheýiniń kózi joıyldy, dep habarlaıdy Kazinform agenttiginiń menshikti tilshisi.

Tájikstan Respýblıkasy Ulttyq qaýipsizdik memlekettik komıteti Shekara áskeriniń habarlaýynsha, 2026 jyldyń 29 qańtarynda shamamen saǵat 19:30-da Hatlon oblysynyń Shamsıddın Shohın aýdanynda ornalasqan Bahorak shekara beketiniń qyzmet kórsetý aımaǵynda 5 aýǵan kontrabandashysy memlekettik shekaradan zańsyz ótti. 

– Shekarashylar buıryǵyna baǵynbaǵan kontrabandashylar qarý-jaraq pen oq-dári paıdalanyp, qarýly qarsylyq kórsetip, Aýǵanstan baǵytynda qashýǵa áreket jasady. Oqıǵa ornynda jasalǵan qarymta atys nátıjesinde úsh aýǵan kontrabandashysy zalalsyzdandyryldy, al ekeýi Aýǵanstan baǵytynda qashyp qutyldy, - dep habarlaıdy vedomstvo.

Oqıǵa ornynda tórt magazıni bar 3 Kalashnıkov avtomaty, 150 oq-dári jáne 73 paket gashısh pen apıyn salynǵan 4 sómke tárkilendi. 

Memlekettik shekaradaǵy jaǵdaı qazirgi ýaqytta baqylaýda, oqıǵa tergelip jatyr. 

Aıta keteıik, buǵan deıin Aýǵanstanmen shekarada bolǵan qarýly qaqtyǵysta eki tájikstandyq shekarashy qaza tapqan bolatyn.