Tájik-aýǵan shekarasynda iri kólemdegi esirtki partııasy toqtatyldy
ASTANA. KAZINFORM – Tájikstan shekarashylary Aýǵanstannan asa iri kólemde tasymaldanǵan esirtki zattarynyń zańsyz ótkizilýine jol bermedi. Memlekettik shekarany kesip ótken bir adam ustaldy, dep habarlaıdy Kazinform menshikti tilshisi.
Tájikstan Ulttyq qaýipsizdik memlekettik komıteti Shekara áskerleriniń baspasóz ortalyǵynyń málimetinshe, 2026 jylǵy 10 aqpanda saǵat 01:20 shamasynda Hatlon oblysyndaǵy «Darqad» shekara zastavasynyń jaýapkershilik aımaǵynda tórt aýǵan azamaty memlekettik shekarany zańsyz kesip ótip, Aýǵanstan aýmaǵynan Tájikstanǵa kirgen.
– Shekara áskerleri operatsııa júrgizý barysynda qylmyskerlerdiń qozǵalys baǵyttaryn anyqtap, asa iri kólemdegi esirtkiniń zańsyz aınalymyna jol bermedi. Aýǵanstannyń Tahar provıntsııasy Darqad ýálaıaty Maıdapata qystaǵynyń turǵyny, shamamen 45 jastaǵy Avalmır valadı Abdýlhakım esimdi kúdikti ustaldy. Odan «gashısh» túrindegi esirtki zaty salynǵan 46 paket tárkilendi, – dep habarlady vedomstvo.
Toptyń ózge músheleri Aýǵanstan aýmaǵyna keri shegingen.
Eske salaıyq, 29 qańtarda Tájikstan shekarasynda úsh aýǵan kontrabandashy joıylǵan bolatyn.
