Tájik-aýǵan shekarasynda 4 lańkestiń kózi joıyldy
ASTANA. KAZINFORM – Tájikstan shekarasynda Aýǵanstannan kelgen 4 lańkestiń kózi joıyldy, dep habarlaıdy Kazinform Hovar NIAT agenttigine silteme jasap.
Tájikstan Respýblıkasy Ulttyq qaýipsizdik memlekettik komıtetiniń Shekara áskerleriniń baspasóz ortalyǵy habarlaǵandaı, 2026 jylǵy 18 qańtarda saǵat shamamen 00:30-da Shamsıddın Shohın aýdanyndaǵy 7-shi shekara zastavasyna terrorıstik uıymnyń tórt múshesi memlekettik shekarany buzyp, Aýǵanstannyń Badahshanvın provıntsııasynyń Darbandak aýylynan Tájikstan aýmaǵyna ótken.
Jedel-izdestirý sharalary barysynda lańkesterdiń ornalasqan orny anyqtaldy. Shekarashylardyń berilý týraly talabyna baǵynbaǵan terrorıster qarýly qarsylyq kórsetken.
Qaqtyǵys kezinde 4 lańkes zalalsyzdandyryldy. Oqıǵa ornynan 3 «Kalashnıkov» avtomaty, 1 sheteldik vıntovka, 6 oqpan, 183 dana AK jáne tapanshanyń patrondary, 3 uıaly telefon, 1 radıoqabyldaǵysh jáne 1 qaıyq tárkilendi.
Vedomstvo bul oqıǵa boıynsha qylmystyq is qozǵalǵanyn, qazirgi ýaqytta memlekettik shekaradaǵy jaǵdaı baqylaýda ekenin habarlady.
Eske salsaq, osyǵan deıin AQSh Somalıdegi lańkesterge birneshe soqqy jasaǵanyn jazǵan edik.
