Tájirıbesi bar mamandardy stýdentterge dáris berýge tartýǵa bolady

NUR-SULTAN. QazAqparat - Tájirıbeli mamandar stýdentterge dáris bere alatyn boldy. Bul týraly QR BǴM Bilim jáne ǵylym salasyndaǵy baqylaý komıtetiniń tóraıymy Gúlzat Kóbenova aıtty, dep habarlaıdy QazAqparat tilshisi.

«Qazirgi ýaqytta mınıstrlik 17 joǵary oqý ornyna jospardan tys tekserýdi bastady jáne jyl sońyna deıin tekserýlerdi josparly túrde júrgizetin bolady. Árıne, bul jerdegi eń basty másele, JOO-lardyń bilim berý baǵdarlamalaryn sapaly daıyndaýyna baılanysty. Sol bilim berý baǵdarlamasyn aıaqtap shyqqannan keıin «túlek qanshalyqty jumysqa ornalasady?», «qanshalyqty suranysqa ıe bolady?», osyǵan oraı 5 maýsymda JOO-larǵa qoıylatyn biliktilik talaptaryna ózgerister engizildi. Kadrlardy daıyndaýǵa lıtsenzııa alý úshin JOO-nyń baǵdarlamalary saraptamadan ótýi kerek jáne Bilim mınıstrliginiń oqý baǵdarlamalary tiziminde bolýy tıis», - dedi Gúlzat Kóbenova mınıstrliktiń Facebook-paraqshasynda ótken onlaın-brıfıng barysynda.

Sonymen qatar komıtet tóraıymy joǵary oqý oryndarynyń professor-oqytýshy quramyna qoıylatyn talaptardyń da ózgergendigin aıtty.

«Endigi ýaqytta JOO oqý barysyna tájirıbeli mamandardy tarta alady. Mysaly, burynǵy jyldary JOO-larda ǵylymı dárejeleri bar oqytýshylar 50 paıyzdy quraýy qajet bolsa, bıyldan bastap 40 paıyzǵa tómendetildi. Negizgi shtattaǵy professor-oqytýshy quramy burnaǵy jyly 80 paıyzdy qurasa, ótken jyly 60 paıyz boldy. Endigi ýaqytta ulttyq biliktilik sheńberi aıasynda tájirıbesi mol mamandardy tartýǵa bolady», - dedi ol.