Tájirıbeli dıplomat retinde Toqaevtyń bılik pen halyq arasyndaǵy baılanysty nyǵaıtýǵa qabileti jetedi - Meırambek Qıyqov
Onyń aıtýynsha, Táýelsizdik alǵannan keıingi 28 jyldyń ishinde Qazaqstan óziniń tarıhynda bolmaǵan úlken ózgeristerge qol jetkizdi. Ekonomıkasy qaryshtap damyp, álemge tanyldy. Beıbitshilikti saqtaý turǵysynda álemge úlgi kórsettik. Osynyń bári turaqtylyqtyń arqasynda ornyǵyp otyr. Mine, osy úrdisti odan ári jalǵastyryp, halyqtar arasyndaǵy birlik pen tatýlyqty, dostyqty nyǵaıtý Táýelsiz elimizdiń ekinshi Prezıdenti Qasym-Jomart Toqaevqa júktelip otyr.
«Eldiń órkendeý kepili memleketshildik pen dástúr sabaqtastyǵynda jáne oǵan degen qurmet pen adaldyqta jatyr. Onsyz eshqashan turaqtylyq ta, damý da bolmaıdy. Búgin de bizge álem kóz tigip otyr. «Bular qalaı saılaýdy ótkizdi eken, halyqtyń birligi qalaı eken?», dep, syrt kóz synshy bolyp otyrǵanda, halqymyzdyń birligin kúsheıtýimiz kerek. Ol úshin bılik pen halyq arasyndaǵy baılanysty nyǵaıtý kerek. Búgingi kúni túıitkildi bolyp otyrǵan áleýmettik máseleler birinshi kezekte sheshilýi tıis. Buǵan dıplomat retinde kóp jylǵy tájirıbesi bar jańa Prezıdent Qasym-Jomart Toqaev barynsha úles qosady dep senemin. Aǵa urpaq sony qalaıdy», deıdi Meırambek Qıyqov.
Sonymen qatar, ol qazirgi ustanǵan baǵytymyz durys, biraq, qatyp qalǵan qaǵıda joq, álemde ózgeris bolyp jatqannan keıin biz de soǵan qaraı beıimdelip, ósýimiz kerektigin aıtady.
«Kórshi elderge de qarap, jahanda bolyp jatqan jaǵdaılarǵa kóńil aýdaryp, soǵan qaraı áreket ete bilýimiz kerek. Áleýmettik-saıası jaǵdaılardaǵy ózgerister de bul zamannyń, ýaqyttyń talaby. Ekonomıkany damytatyn jastarymyzdy bilimdi de, ónerli etip tárbıelesek bolashaǵymyz da jarqyn bolary sózsiz. Elimizde demokratııa damyp, saıası mádenıetimiz ósti. Sondyqtan, memleketti basqarýda tájirıbesi mol, halyqaralyq jaǵdaıda ózin tanyta alatyn jańa Prezıdent osy máselelerge erekshe nazar aýdarsa eken deımiz», dep túıindedi Meırambek Qıyqov.
