Tájirıbeden ótip júrgen stýdentterge 60 myń teńge kóleminde jalaqy berilýde - E. Imanǵalıev
ASTANA. QazAqparat - Qazirgi ýaqytta tájirıbeden ótip jatqan stýdentterge 60 myń teńge kóleminde jalaqy berilýde. Bul týraly búgin Ortalyq kommýnıkatsııalar qyzmetinde tehnıkalyq jáne kásiptik bilim berý taqyrybyna arnalǵan baspasóz máslıhatynda Bilim jáne ǵylym vıtse-mınıstri Esenǵazy Imanǵalıev málim etti.
«Saraptama nátıjelerine súıensek, dýaldi júıe kadrlardy daıarlaý, jastar arasyndaǵy jumyssyzdyqty tómendetý máselesin sheshýdiń eń tıimdi modeli bolyp tabylady. Oqytýdyń dýaldi júıesinde óndiris halyqaralyq deńgeıde 60 elde keńinen taralǵan. Onyń negizgi ereksheligi - bilim berý teorııasy men tájirıbesi kásiporynmen birge ushtasyp jatyr. Qazaqstanda osy modelge kóshý aıasynda 60 paıyzy óndiris arqyly, al 40 paıyzy teorııa retinde oqý ornynda júrgizilýde»,-dedi E. Imanǵalıev.
Osy oraıda ol oqýshy bolashaqta baratyn mamandyǵy boıynsha óndirispen aldyn ala tanysa bastaıtyndyǵyn, sonymen qatar tıisti shartqa otyratyndyǵyn atap ótti.
«Shartta kóptegen jańashyldyqtar qamtylǵan. Buryndary tájirıben ótý kezinde stýdentke jalaqy tólenbeıtin edi, al endi qazir bul baǵytta eńbekaqy tólenip júr. Ortasha alǵanda tájirıbeden ótip jatqandarǵa 60 myń teńge kóleminde jalaqy berilýde. Qosymsha osy joba boıynsha birneshe mekemeler ózderiniń granttaryn taǵaıyndap jatyr, ıaǵnı kásipkerler grant berip, jas mamandardy oqytyp jatyr»,-dedi E. Imanǵalıev.
Onyń sózine qaraǵanda, 800- den astam kásiptik oqytý mekemeleri bolsa, sonyń 34 paıyzy dýaldi júıeni paıdalanyp otyr. Bul turǵyda 348 kolledj qamtylǵan.
