Tájirıbe: Wi-Fi jelisi adam densaýlyǵyna zııan
ASTANA. 1 maýsym. QazAqparat - Danııa eliniń mektep oqýshylary Wi-Fi jelisiniń adam densaýlyǵyna zııan ekenin tájirıbe júzinde dáleldep shyǵyp, ǵalymdar álemin bir dúr silkindirdi.
Olar Wi-Fi jelisi qosýly turǵan uıaly telefonnyń qasynda uıyqtaǵan adamnyń kelesi kúni zeıini nasharlap ketetinine tájirıbe júzinde kóz jetkizgen.
Oqýshylar ekpe shytyrmaq ósimdiginiń tuqymy egilgen naýanyń bireýin Wi-Fi jelisi bar bólmege, ekinshisin Wi-Fi jelisine qosylmaǵan bólmege kirgizip, 12 kún boıy baqylaǵan. Nátıjesinde Wi-Fi jelisi joq bólmedegi ósimdik qaýlap ósse, ekinshi bólmedegi ósimdik sol kúıi túk shyqpaı qalǵan.
Mektep oqýshylarynyń bul tájirıbesine kóptegen keritartpa adamdar senbegen. Bireýleri ósimdikterge teń dárejede jaǵdaı jasalmaǵan, ıaǵnı, bireýine sý quıylyp, ekinshisine quımaǵan nemese birine kún kózi jaqsy túsken de, ekinshisine túspegen degen sekildi ýájder aıtyp, kúdik-kúmán keltirgen. Biraq mektep oqýshylary ekeýine de birdeı jaǵdaı jasalǵanyn aıtyp otyr.
muslim.kz saıtynyń jazýynsha, bul tájirıbege ózge de ǵalymdar qyzyǵýshylyq tanytýda. Atap aıtsaq, Shvetsııanyń Karolına ýnıversıtetiniń professory bul tájirıbeni óziniń ǵylymı zerthanasynda jasap kórýge bel býǵan.
Jalpy dál osyndaı tájirıbe osydan birneshe jyl buryn Gollandııada da jasalǵan kórinedi. Sol tájirıbede de Wi-Fi jelisi bar aımaqta ornalasqan taldarda sáýle aýrýlarynyń belgisi anyqtalyp, japyraqtarynda tabıǵı emes qorǵasyn jaltyraǵy paıda bolǵan.
