Tájikstannyń ishki ister mınıstrligi terrorızmge qarsy operatsııa bastaǵanyn habarlady

DÝShANBE. Hovar - QazAqparat – Tájikstanda terrorızmge qarsy operatsııa bastaldy, dep habarlaıdy QazAqparat Tájikstannyń Hovar agenttigine silteme jasap.

Agenttiktiń Tájikstan Respýblıkasy Іshki ister mınıstrliginiń baspasóz ortalyǵyna silteme jasap habarlaýynsha, 2022 jyldyń 17 mamyrynda uıymdasqan qylmystyq top músheleri qoǵamdyq-saıası jaǵdaıdy turaqsyzdandyrý maqsatynda Tájikstan Respýblıkasy Rýshan aýdanyndaǵy avtojol ýchaskesinde, memlekettik shekara syzyǵynda «Dýshanbe — Kýlma» halyqaralyq avtotrassasyn zańsyz jaýyp tastaǵan.

Qylmyskerler halyqaralyq terrorıstik uıymdardyń qoldaýymen elden tys jerde qarý-jaraq pen oq-dáriler alǵan, sondaı-aq terrorıstik áreketter men arandatýdyń basqa túrlerin júzege asyrý úshin sheteldik jaldamaly sodyrlardy tartqan.

Bul áreket konstıtýtsııalyq qurylystyń negizderine qarsy baǵyttalǵan. Uıymdasqan qylmystyq toptar quqyq qorǵaý organdary qyzmetkerleriniń qarý-jaraq pen oq-dárilerdi tapsyrý týraly zańdy talaptaryn oryndamaǵan jáne qarýly qarsylyq kórsetken.

Halyqaralyq terrorıstik uıymdar qurǵan jáne qarjylandyratyn Rýshan aýdanynda uıymdasqan qylmystyq toptar áreketinde terrorıstik sıpattaǵy qylmys belgileri bar.

«Osyǵan baılanysty azamattardyń qaýipsizdigin, qoǵamdyq tártipti qamtamasyz etý jáne «Dýshanbe — Kýlma» halyqaralyq avtomobıl joly boıynsha Rýshan aýdanyndaǵy jol ýchaskesinde kólik quraldarynyń kedergisiz qozǵalysyn qalpyna keltirý maqsatynda eldiń quqyq qorǵaý organdary terrorızmge qarsy operatsııany bastady»,-delingen Tájikstan aqparat agenttigi taratqan habarda.