Tájikstannyń Hýdjand qalasynda «Shymkent» kvartaly ashyldy

ASTANA. QazAqparat - Qazaqstannyń Tájikstan Respýblıkasyndaǵy Elshiliginiń jáne Ońtústik Qazaqstan oblysy ákimdiginiń qoldaýymen jaqynda qazaqstandyq delegatsııa Tájikstan Respýblıkasy Sogdıı oblysyna saparmen barǵan bolatyn. Onyń aıasynda Hýdjand qalasynda «Shymkent» kvartaly ashyldy. Bul týraly QR Syrtqy ister mınıstrliginiń baspasóz qyzmetinen habarlandy.

Sapar aıasynda Ońtústik Qazaqstan oblysy ákiminiń orynbasary Ulasbek Sádibekov Sogdıı oblysynyń tóraǵasy Abdýrahmon Kodırımen kezdesken. Taraptar baýyrlas qalalar Shymkent pen Hýdjand arasyndaǵy ózara árekettestikti talqylap, túrli saladaǵy yntymaqtastyq perspektıvalaryn áńgimege arqaý etti.

«Sonymen qatar, Hýdjand qalasynda «Shymkent» kvartalynyń ashylý saltanaty bolyp ótti. Atalǵan shara baýyrlas qalalardyń ózara syılastyǵynyń belgisi retinde ári eki memlekettiń táýelsizdiginiń 25 jyldyǵyna arnalyp otyr», - delingen baspasóz baıanynda.

Budan bólek, qazaqstandyq delegatsııa óńirdiń áleýmettik-ekonomıkalyq damý jaǵdaıymen jiti tanysý maqsatynda Sogdıı oblysynyń kásipkerlerimen, iskerlik ortasymen kezdesýler ótkizdi. Onda tájik tarapynyń ınvestıtsııalyq áleýeti tanystyryldy. Sapar qorytyndysyna sáıkes, Ońtústik Qazaqstan oblysy men Tájikstannyń Sogdıı oblysy óńirler arasynda ózara tıimdi yntymaqtastyqty odan ári damytýǵa qyzyǵýshylyq bildirgen.