Tájikstannyń eń qart turǵyny 127 jasynda kóz jumdy

DÝShANBE. Hovar-QazAqparat – 127 jasynda Tájikstannyń eń qart turǵyny Fotıma Mırzokýlova qaıtys boldy. Ol 1893 jyly 13 naýryzda dúnıege kelgen, dep habarlaıdy QazAqparat «Hovar» agenttigine silteme jasap.

«Fotıma ájeıdiń nemere, shóbere jáne nemeneleriniń sany 200-den asyp jyǵylady. Bul súıkimdi áıel júzjyldyqtyń úsheýin kórdi – 19, 20 jáne 21-inshi», - dep málim etti Asht aýdany Memleket bıliginiń atqarýshy organynda.

BAQ aqparattaryna sáıkes, keıýana óz betimen júrip-turyp, densaýlyǵyna eshqashan shaǵymdanbaǵan.

Eki jyl buryn Dahana aýylynda F.Mırzokýlova balalary, nemereleri jáne týys-týǵandary arasynda 125 jyldyq mereıtoıyn atap ótti. Osyǵan oraı saltanatty shara da uıymdastyrylǵan.

Jyl saıyn Ana kúni qurmetine Tájikstan Respýblıkasy Prezıdentiniń Atqarýshy apparatynyń ókilderi F.Mırzokýlovaǵa jáne ózge de uzaq jasaǵan áıelderge iltıpat bildirip, qonaqta bolady.

Onyń ólimi týraly birqatar BAQ-ta jazyldy. Máselen, Daily Mail-diń málimetinshe, tájikstandyq ájeıdiń pasportyndaǵy derekter shyndyqqa sáıkes kelse, ol álemdegi eń qart áıel bolyp tabylady.

Aıta keteıik, búginde resmı túrde álemdegi eń qart áıel japonııalyq Kane Tanaka sanalady. Ol bıyl 117 jasqa toldy.

Byltyrǵy jyldyń qazanynda Reseıdiń Astrahan oblysynda eń uzaq ómir súrgen Tánzılá Bısembeeva dúnıeden ótti. Etnıkalyq qazaq T.Bısembeeva 2016 jyldan bastap resmı túrde ǵalamshardyń eń qart turǵyny atandy. Bul týraly Reseıdiń Rekordtar kitabynda aıtylǵan. Ol aǵymdaǵy jyly 125 jasqa tolýshy edi.