Tájikstanǵa gaz jetkizý toqtatylmaq
ASTANA. 26 naýryz. QazAqparat - Tájikstan 2012 jylǵy 1 sáýirden bastap ózbek gazynsyz qalady. Bul týraly «Interfaks» Tájikstan energetıka jáne ónerkásip mınıstrligine silteme jasap habarlady.
Agenttiktiń atap ótýinshe, Ózbekstan Tájikstanǵa birden-bir sheteldik gaz jetkizýshi, al elde otynnyń bul túrin óndirýi tym mardymsyz.
«Óztransgaz» basshylyǵy Dýshanbege joldaǵan hatynda ózderi úshin negizgi áriptesi - Qytaıǵa gaz jetkizilimi mindettemesin oryndaý mańyzdyraq ekenin basa aıtty. Tashkent «gaz resýrstarynyń jetispeýshiliginen» jetkizilimdi toqtatatyn ýájin bildirdi.
«Ózbek tarapynyń ýájimen kelise almaımyz. Óıtkeni búgingi tańda Ózbekstan táýligine 200 mıllıon tekshe metrden astam tabıǵı gaz óndiredi, bul Tájikstannyń búkil 2012 jylǵa josparlanǵan jetkizimine teń derlik», - dep málimdedi tájik mınıstrligi. Alaıda eldi otynmen qamtamasyz etý jóninde qandaı sharalar qabyldaıtyny aıtylmaǵan.
2012 jyly Tájikstanǵa ózbek gazynyń jetkizilimi 2 kún - 4 jáne 5 qańtarda toqtatyldy. Ol kezde Tashkent 2012 jylǵa kelisim-shart jasalmaǵanyn jeleý etti. Budan keıin tıisti qaǵazdarǵa qol qoıylyp, jetkizilim jalǵastyryldy.
Asia Plus basylymynyń tájik energetıka vedomstvosyndaǵy derekkóziniń paıymdaýynsha, onyń basty sebebi - eki memlekettiń Farhad bógeti men sý qoımasy tóńiregindegi janjalyna baılanysty. Keńestik kezeńde bul aýmaq Ózbekstanǵa jalǵa berilgen bolatyn, sodan beri qaıtarylǵan joq, al qazir Tashkent bóget pen sý qoımasyn ózderine túpkilikti alyp qalmaq, oǵan tájik jaǵy ázirshe kelisim bermeı otyr», - dep málim etti derekkóz.
