Tájikstandaǵy búlikshil generaldyń mert bolǵany rastaldy
ASTANA. QazAqparat - Tájikstan kúshtik qurylymy eldiń burynǵy Qorǵanys mınıstri Ábdýhalım Nazarzodanyń qazasy týraly aqparatty resmı rastady, dep habarlady «VVS» agenttigi.
Tájikstannyń ІІM men Memlekettik Ulttyq qaýipsizdik komıtetiniń málimetterinshe, búlikshil general Nazarzoda men onyń 11 jaqtasy Ramıt ańǵarynda ótken arnaıy áskerı is-qımyldar barysynda berilýden bas tartqan soń óltirildi.
«Lańkester boı bermeı qarsylasty. Qoja Halım Nazarzodanyń bandıttik tobynyń basshysy, qorǵanys mınıstriniń burynǵy orynbasary Eshonı Jýnaıdýllo Omarov pen onyń 10 sybaılasy óltirildi», - delingen ІІM-niń resmı habarlamasynda.
Buǵan deıin kúsh qurylymdary qyzmetkerleri Nazarzodanyń qarýly jaqtastarymen Ramıt ańǵaryndaǵy qaqtyǵysy kezinde «Alfa» lańkestikke qarsy bólimshesiniń komandıri, polkovnık Rýstam Amakıevtiń, sondaı-aq arnaıy taǵaıyndalǵan mılıtsııa jasaǵy men «Alfanyń» úsh qyzmetkeri qaza bolǵany belgili boldy.
Tájikstan bıligi Nazarzoda men onyń jaqtastaryn 4-6 qyrkúıek kúnderi aralyǵynda kúsh qurylymdary ókilderine qarsy jasaǵan birqatar qarýly shabýyldary úshin aıyptady. Bul shabýyldardyń saldarynan 20-dan astam adam qaza tapty. Onnan asa kúdikti adam ustaldy.
