Tájikstanda «Jaýyngerlik baýyrlastyq-2017» oqý-jattyǵýy ótti
Bir jarym aı boıy Reseı, Armenııa, Qazaqstan jáne Tájikstannyń polıgondarynda UQShU-nyń barlyq elderinen kelgen áskerı kontıngentter áskerlerdiń koalıtsııalyq toptamalaryn birlesip josparlaý jáne qoldaný sheberlikterin shyńdady.
Oqý-jattyǵýdyń sheshýshi kezeńi úshin tájik-aýǵan shekarasynan 20 shaqyrym qashyqtyqta ornalasqan «Harbmaıdon» polıgony tańdaldy. Oqý-jattyǵýdyń túpki nıeti boıynsha Ujymdyq qaýipsizdik týraly Shart Uıymynyń elderiniń birine óńirdegi jaǵdaıdy turaqsyzdandyrý maqsatynda zańsyz qarýly quralymdar basa kóktep kirdi.
Al Ujymdyq jedel den qoıý Birikken shtaby ulttyq qarýly kúshterge kómek kórsetý úshin UQShU múshe memleketteriniń áskerı kontıngentterin qoldanýǵa sheshim qabyldady. Oqý-jaýyngerlik tapsyrmalardy oryndaý úshin Tájikstan Respýblıkasyna arnaıy operatsııalar kúshteriniń bólimsheleri almastyryldy jáne maıdandyq pen áskerı-kólik avıatsııasynyń 15 ushaǵy tartyldy.
Jaýyngerlik tapsyrmalardy alǵannan keıin top komandırleri qoıylǵan tapsyrmalardy oryndaýǵa sheshim qabyldady jáne kiristi. QR QK Arnaıy operatsııalar kúshteriniń bólimsheleri shyǵýy qıyn taýly aýdandarda qondyrý tásilimen desanttaýdy jasaýdy jáne shartty qarsylasty oqshaýlady. Qazaqstan ÁÁK maıdandyq avıatsııasy sodyrdardyń jınalatyn, zańsyz qarýly quralymdardyń tehnıkasy men qarý-jaraǵynyń shoǵyrlanatyn jerlerin belgileıtin mejeler arqyly dál zymyran-bombalyq soqqylar jasady. Osy árekettermen sodyrlardyń jaqyn mańdaǵy rezervteri olardyń negizgi kúshterinen ajyratyldy. Bul basty soqqy baǵytynda Tájikstan Qarýly Kúshteri batalondyq taktıkalyq toptarynyń jaýyngerlik tapsyrmalarynyń sátti oryndalýyn qamtamasyz etti.
Tájikstan Respýblıkasynyń Qorǵanys mınıstri general-leıtenant Sheráli Mırzo jabylý saltanatynda oqý-jattyǵýdyń barlyq qatysýshylaryna joǵary baǵa berdi. Al oqý-jattyǵýdyń jetekshisi RF QK Ortalyq áskerı okrýgi áskerleriniń qolbasshysy general-polkovnık Vladımır Zarýdnıtskıı oqý-jattyǵýdyń barlyq kezeńderinde kópulttyq áskerı kontıngenttiń is-qımyldarynyń naqtylyǵy men úılesimdiligin atap ótti. Úzdik áskerı qyzmetshiler medaldarmen, baǵaly syılyqtar jáne gramotalarmen marapattaldy.
«Elimizdiń Qarýly Kúshteriniń jaýyngerleri kezekti ret ózderiniń joǵary jaýyngerlik mashyqtary men kásipqoılyqtaryn pash etti. Bul Elbasymen aıqyndalǵan áskerimizdiń durys baǵyttaǵy damý jolyn bildiredi jáne Qorǵanys mınıstrimen iske asyrylýda», - dedi Qazaqstan Respýblıkasynan áskerı kontıngentti basqarǵan QR QK Bas shtaby bastyǵynyń orynbasary general-maıor Ádilbek Aldabergenov.
