Tájikstanda jaqyn týystardyń nekelesýine tyıym salynýy múmkin
Qazirgi tańda eldiń Densaýlyq saqtaý mınıstrligi atalǵan jaǵdaıatqa baılanysty zań jobasyn ázirleý qajettigin alǵa tartyp otyr. Mınıstrliktiń mundaı bastama kóterýine bir-birimen úılengen óte jaqyn týystardyń otbasylarynda týǵan balalardyń arasynda múgedekterdiń tym kóbeıip ketkeni májbúr etken. Osy oraıda vedomstva mamandary Hatlon oblysynda júrgizgen zertteý nátıjelerin alǵa tartqan. Hatlon oblystyq densaýlyq saqtaý basqarmasy málim ketkendeı, óńirde 18 jasqa deıingi 9 700 múgedek bar eken. Olardyń 1 546-sy jaqyn týystardyń nekelesýinen týǵandar kórinedi. Respýblıkada osyndaı nekelerden dene jáne aqyl-es kemistigi bar balalar kóp týylyp jatqany dáleldense de, elde buǵan tosqaýyl qoıar zań joq. Osy jóninde 2013 jyly qyzý talqylaý bolǵan. Biraq ol bos sóz retinde qalyp qoıǵan-dy. Endi mine, bul taqyryp qaıtadan sóz bola bastady. Bul joly máseleni el prezıdenti Emomalı Rahmon kóterdi. Demek, óte jaqyn týystardyń shańyraq kóterýine zań júzinde toqtaý salý isi óz sheshimin tabatyny ábden múmkin. Jalpy, dástúrli, ábden qalyptasyp qalǵan úrdiske prezıdenttiń ózi qarsy shyqsa, mundaı nekelerden tájik ultynyń kóp zardap shegip otyrǵanyn anyq ańǵarýǵa bolady. E.Rahmon: «Memlekette 13 myń múgedek bala bar.Olardyń basym bóliginiń áke-shesheleri óte jaqyn týystar. Sondyqtan, Densaýlyq saqtaý jáne áleýmettik qamsyzdandyrý mınıstrligi mundaı nekelesýdi túp-tamyrymen qurtý maqsatynda jumys isteý kerek», dedi. Árıne, qoǵam bolǵan soń ártúrli pikirler aıtylyp jatady. Tájikstan prezıdentiniń sózin halyqtyń bir bóligi qoldasa, ekinshi bóligi qabyldaǵysy joq. Týysqandardyń nekelesýin qoldaıtyndardy da túsinýge bolar. Óıtkeni, mundaı otbasy qurý dástúri tájikterdiń arasynda kóptegen ǵasyrlar boıy jalǵasyp kelgen. Al osylaısha qalyptasqan úrdisten halyqty birden ajyratý ońaı sharýa emes. Kóptegen adamdar ózge, týystyq jaǵynan alys otbasymen quda bolýdy jaratpaıdy. Mundaı pikirdegiler týystardyń nekesinen týǵan balalardyń geninde kinárat bar ekenin rastaıtyn naqty ǵylymı dáıekter kerek dep sanaıdy. Al din ókilderiniń sózine qaraǵanda, nemereles týysqandardyń nekelesýin Islam dini qoldamaıdy, biraq, oǵan tyıym da salmaıdy eken. Degenmen, Islam ǵalymdary týystyq jaǵynan alys jandardyń nekesinen týǵan balalardyń densaýlyqtary jaqsy bolatynyn aıtady. Aıta keteıik, Ulybrıtanııada júrgizilgen news-asia.ru sońǵy zertteý nátıjesinde týysqan adamdardyń nekesinen týǵan sábıler arasynda dene jáne aqyl-es kemistigi bar balalardyń kóp kezdesetini anyqtalǵan.