Tájikstanda týystarǵa nekege otyrýǵa tyıym saldy
ASTANA. QazAqparat - Tájikstanda azamattyq hal aktisin tirkeý týraly zańǵa jáne respýblıkanyń otbasy kodeksine túzetýler kúshine endi. Oǵan sáıkes jaqyn týystar arasyndaǵy nekege tyıym salynady jáne jas jupty mindetti medıtsınalyq tekserý engizilgen.
Zań qujattarynyń jańa erejelerine sáıkes «bóle-nemere aǵaıyndy-ápkeli, sondaı-aq aǵa, apalarǵa óziniń jıen-nemere týystarymen nekege otyrýǵa tyıym salynady», - dep málimdedi osy jylǵy qańtarda úkimet usynǵan túzetýlerdi qoldaǵan el parlamentiniń baspasóz qyzmeti.
Budan buryn Tájikstan densaýlyq saqtaý jáne áleýmettik qorǵaý mınıstri Nýsratýllo Salımzoda elde 2015 jyldyń basynda 30 myńnan astam múgedek bala tirkelgenin habarlaǵan, olardyń kópshiligi - jaqyn týystarymen otbasy qurǵandardyń balalary.
Mundaı derekterdi DSjÁQM ana men balaǵa medıtsınalyq qyzmet uıymdastyrý jáne otbasyny josparlaý basqarmasynyń bastyǵy Sheralı Rahmatýlloev keltiredi. Onyń aıtýynsha, «respýblıkada 26 myńnan astam múgedek bala tirkelgen, olardyń 35 paıyzy týystarymen qosylǵan otbasynyń balalary, al 10-20 paıyzy- ata-analary ınfektsııalyq aýrýmen aýyratyn balalar».
Rahmatýlloev juptardy medıtsınalyq tekserý tegin ekenin atap ótti. «Zań kúshine engennen keıin jáne jas juptardyń birinde ınfektsııalyq aýrý anyqtalǵan jaǵdaıda, ol tolyq emdelý kýrsynan ótýi tıis jáne saýyqqannan keıin ǵana nekege otyrýǵa ruqsat beriledi», - dep naqtylady ol.
AHAJ organdarynyń búginnen bastap medıtsınalyq anyqtamasyz jas jubaılardy nekege otyrǵyzýǵa quqyǵy joq, dep habarlady TASS.
