Tájikstanda turǵyn úılerdi qar kóshkini basyp, 15 adam qaza tapty
Bul týraly Tájikstan Úkimeti janyndaǵy Tótenshe jaǵdaılar jáne azamattyq qorǵanys komıteti habar taratty, dep habarlaıdy QazAqparat.
«Qar kóshkini saldarynan 4 turǵyn úı tutastaı, 35 úı jartylaı, 5 sharýashylyq nysany qırady. GBAO aýmaǵynda 14 adam, Varzob aýdany aýmaǵynda 1 adam qaza tapty, 12 adam túrli dene jaraqattaryn aldy», - delingen habarlamada.
Oblystyq tótenshe jaǵdaılar jónindegi komıssııa keltirilgen shyǵyndy anyqtap jatyr.
Sınoptıkterdiń boljaýynsha, qar kóshkini qaýpi 2023 jyldyń 19 aqpanyna deıin saqtalady.
Tájikstan Respýblıkasynyń Úkimeti janyndaǵy Tótenshe jaǵdaılar jáne azamattyq qorǵanys komıteti qaza bolǵandardyń otbasylaryna kóńil aıtady jáne turǵyndardy uzaq saparlarǵa, qar kóshkini júretin aımaqtarǵa barmaýǵa shaqyryp, saq bolýlaryn suraıdy.
Buǵan deıin Komıtet sońǵy kúnderi aýa raıynyń jylynýy men jaýyn-shashynǵa baılanysty GBAO-nyń batys aımaqtarynda, Gıssar taýlarynda, sondaı-aq Dýshanbe-Horog, Dýshanbe-Hodjant, Dýshanbe-Lıahsh, Horog-Mýrgab, Horog-Ishkashım aýdandarynda kóshkin qaýpi saqtalatynyn habarlaǵan bolatyn.
Foto: khovar.tj