Tájikstanda túnnen beri tórtinshi ret jer silkindi
QR Tótenshe jaǵdaılar mınıstrligine qarasty «Seısmologııalyq tájirıbe-ádistemelik ekspedıtsııasy» JShS-nyń seısmostantsııalary búgin saǵat 08.53-te taǵy bir jer silkinisin tirkedi. Epıtsentri Almaty qalasynan ońtústik-batysqa qaraı 723 km qashyqtyqta Tájikstan aýmaǵynda ornalasty. Energetıkalyq sanaty – 11,5. MPV magnıtýdasy – 5,1. Tereńdigi – 15 km. MSK-64 baǵany boıynsha sezilý týraly aqparat joq.
Buǵan deıin habarlaǵanymyzdaı, búgin túnde Taraz, Shymkent jáne Túrkistan turǵyndary 2-3 ball qýatymen jerasty dúmpýin sezindi. Jer silkinisiniń oshaǵy Almaty qalasynan ońtústik-batysqa qaraı 740 km qashyqtyqta Tájikstan aýmaǵynda ornalasty. Sondaı-aq terbelis Ózbekstannyń birqatar qalasyna jetti.
Tańǵy saǵat 06.27-de Qazaqstan seısmologtary Tájikstandaǵy taǵy bir jer silkinisin tirkedi.
Saǵat 07.30-da da Tájikstan men Qyrǵyzstan shekarasynda jerasty qozǵalysy sezildi.
Eske salaıyq, Qazaqstannyń 5 óńir turǵyndary jerasty dúmpýin 21 naýryz kúni de sezingen bolatyn. Zilzala oshaǵy Aýǵanstanda ornalasty. Aýǵan elindegi terbelis Pákistanǵa da jetti. Saldarynan kem degende 11 adam qaza bolǵany týraly buǵan deıin jazǵan edik.
22 naýryzda áleýmettik jelide Qazaqstanda jer silkinisi qaıtalanatyndyǵy týraly aqparat tarady. Alaıda, Túrkistan oblysy Tótenshe jaǵdaılar departamenti bul aqparattyń jalǵan ekendigin málimdedi.