Tájikstanda toıǵa 30-40 adamnan artyq qatysýǵa tyıym salyndy

DÝShANBE – Hovar – QazAqparat – Tájikstan Respýblıkasy úkimeti otyrysynyń hattamalyq tapsyrmasy negizinde jáne koronavırýstyń taralýyna jol bermeý maqsatynda aldaǵy ýaqytta úılený toılary tek otbasylyq sheńberde ótkiziledi, dep habarlaıdy QazAqparat Hovar agenttigine silteme jasap.

Dúısenbi, 27 shildeden bastap engiziletin jańa tártip boıynsha, toıǵa qatysatyndar sany 30-40 adamnan aspaýy kerek.

Osyǵan baılanysty komıtet respýblıkanyń oblys, qala jáne aýdandaǵy atqarýshy organdaryna telegramma jiberdi.

«Bul tártip eldegi koronavırýs jaǵdaıy turaqtalǵanǵa deıin saqtalady», - dep atap ótti Tájikstan Respýblıkasy Úkimeti janyndaǵy Din isteri komıtetiniń baspasóz hatshysy Afshını Mýkım.

Buǵan deıin Tájikstanda epıdemııaǵa qarsy sharalardy kúsheıtý jónindegi respýblıkalyq shtab 20 maýsymnan bastap elde 100 adamǵa deıin qatysatyn is-sharalardy ótkizýge ýaqytsha ruqsat etken bolatyn.