Tájikstanda tártip saqshylary 56 keli esirtkimen ustaldy

ASTANA. QazAqparat - Tájikstanda eldiń ІІM-niń esirtkiniń zańsyz aınalymymen kúres jónindegi aımaqtyq basqarmasynyń tórt qyzmetkeri esirtki saýdasymen aınalysty degen aıyppen ustaldy.

Tájikstannyń tártip saqshylary Aýǵanstanmen shekarada 56 keli esirtkimen ustaldy.

Esirtkiniń zańsyz aınalymymen kúres jónindegi basqarmanyń qyzmetkerleri esirtkini Dýshanbege jibermek bolǵan, alaıda óz áriptesteri tutqyndady, dep habarlady Bı-bı-sı agenttigi Tájikstan ІІM-degi derekkózine silteme jasaı otyryp.

Ustalǵandarǵa qatysty qylmystyq is qozǵaldy.

Resmı málimetter boıynsha, ótken jyly elde esirtki saýdasymen aınalysqanquqyq qorǵaý vedomstvolarynyń 10 qyzmetkeri qamaýǵa alynǵan, olardyń arasynda eldiń qorǵanys mınıstrligi jáne ishki ister mınıstrliginiń qyzmetkerleri bolǵan.

Sońǵy 22 jylda Tájikstannyń quqyq qorǵaý organdary 130 tonnadan astam esirtki tárkilegen, sonyń ishinde 34 tonnasy - geroın.