Tájikstanda shekara zastavasyna shabýyldaǵan toptyń DAISh terrorısteri ekeni anyqtaldy

DÝShANBE. Hovar–QazAqparat – Tájikstanda «Ishkabad» №4 shekara zastavasyna shabýyldaǵan qarýly toptyń DAISh (Qazaqstanda tyıym salynǵan uıym) lańkesteri ekeni anyqtaldy, dep habarlaıdy «QazAqparat» HAA «Hovar» agenttigine silteme jasap.

Tájikstan Respýblıkasy Ulttyq qaýipsizdik memlekettik komıteti Shekara áskerleriniń baspasóz ortalyǵynyń málimdeýinshe, ustalǵandardy tergeý kezinde «Sultanabad» shekara otrıady áskerı bóliminiń №4 «Ishkabad» shekara zastavasyna shabýyl jasaǵandardyń barlyǵy «DAISh» terrorıstik tobynyń arnaýly tapsyrmasymen memleket shekarasyn 2019 jylǵy 3 qarasha kúni túnde zańsyz buzyp kirgeni anyqtalǵan. Agenttiktiń habarlaýynsha, lańkesterdiń barlyǵy — DAISh músheleri.

Olar ózderine «Ishkabad» shekara zastavasyn qolaıly sanap, soǵan qarýly shabýyl jasaǵan.

Qazir jedel tergeý toby tergep-tekserýdi jalǵastyryp jatyr.

Eske sala keteıik, 6 qarashaǵa qaraǵan túni saǵat 03:23-te belgisiz 20 adamnan turatyn qarýly top Tájikstannyń «Sultanabad» shekara otrıady áskerı bóliminiń №4 «Ishkabad» shekara zastavasyna shabýyl jasaǵanyn habarlaǵan edik.

Kúsh qurylymdarynyń jedel áreket etýiniń arqasynda qorshaýǵa alynǵan qarýly qylmystyq toptyń 15 múshesiniń kózi joıyldy, 5-eýi qamaýǵa alynǵan.