Tájikstanda prezıdent saılaýy ótip jatyr
Tájikstan Respýblıkasynyń Saılaý jáne referendým ortalyq komıssııasynyń (SROK) málimeti boıynsha, «Tájikstan Respýblıkasy Prezıdentin saılaý týraly» Konstıtýtsııalyq zańǵa sáıkes, elde saılaýdy uıymdastyryp ótkizý úshin 68 saılaý okrýgi, el ishinde 3375, shetelde 39 saılaý ýchaskesi quryldy.
Saıası partııalar usynǵan qujattardy muqııat zerttegennen keıin Tájikstan Respýblıkasynyń Saılaý jáne referendým ortalyq komıssııasy eldiń Agrarlyq partııasynan, Sotsıalıstik partııasynan, Halyqtyq Demokratııalyq partııasynan, Ekonomıkalyq reformalar partııasynan jáne Kommýnıstik partııasynan kandıdattar tizimin tirkedi.
Osylaısha saılaý bıýlletenderine Tájikstan Respýblıkasynyń Prezıdenttigine 5 kandıdat tirkeldi. El aýmaǵynda ornalasqan saılaý ýchaskeleri 11 qazan kúni jergilikti ýaqyt boıynsha 20:00-de jabylady.
SROK-tyń málimetinshe daýys berý úshin 4 943 289 saılaýshy tirkelgen. Eger saılaý ýchaskelerine saılaýshylardyń 50%-dan astamy kelse, saılaý ótti dep esepteledi.
Saılaý protsesin túrli halyqaralyq uıymdardyń 145-ten astam halyqaralyq baqylaýshylary qadaǵalaıdy. Budan bólek 267 jergilikti jáne sheteldik buqaralyq aqparat quraldary saılaý barysy týraly habarlap otyrady.
Tájikstan Respýblıkasy Prezıdenti saılaýynyń aldyn ala nátıjeleri daýys berý aıaqtalǵannan keıin 24 saǵat ishinde jarııalanady. Sońǵy nátıje saılaý bolǵannan keıin eki aptadan keshiktirilmeı belgili bolady.
Buǵan deıin habarlanǵandaı, TMD elderiniń Parlament aralyq assambleıasynan halyqaralyq baqylaýshylar tobynyń jumysyna QR Parlament Senatynyń depýtaty Talǵat Musabaev qatysady.