Tájikstanda polıomıelıt aýrýynyń órshýi tirkeldi
ASTANA. Sáýirdiń 23-i. QazAqparat - Dúnıjúzilik densaýlyq saqtaý uıymy (DDU) eldiń ońtústik-shyǵysynda oryn alǵan polıomıelıt (sal bop qalý) aýrýynyń órshýine qarsy kúres úshin qyzmetkerlerin Tájikstanǵa attandyrdy, dep habarlaıdy Densaýlyq saqtaý uıymynyń baspasóz qyzmeti.
Deneniń perıferııalyq (shetkergi músheleriniń) ótkir salǵa ushyraýy jaǵdaılarynyń kúrt kóbeıip ketýi Tájikstanda 2010 jyldyń sáýir aıynda tirkeldi. Osy eldiń Densaýlyq saqtaý mınıstrligi ótinishimen DDU-nyń máskeýlik zerthanasy júrgizgen taldaýlar salǵa ushyraýdyń sebebi polıovırýs (súıekke vırýs túsýi) sebebinen bolǵanyn kórsetti.
Sáýirdiń 22-sine deıingi málimetter boıynsha, perıferııalyq salǵa dýshar bolý 128 balada anyqtalyp, olardyń ony shetinep ketken. Aýyrǵan jeti tájik balalarynda zerthanalyq deńgeıde polıomıelıt dıagnozy rastaldy. Munan basqa naq osyndaı - perıferııalyq sal aýrýynyń úsh jaǵdaıy Ózbekstanda da tirkeldi.
Osy ınfektsııanyń órship ketýine baılanysty DDU Tájikstan úkimetine jáne kórshiles memleketterge (Ózbekstan, Túrikmenstan, Qyrǵyzstan men Qazaqstanǵa) perıferııalyq sal aýrýy jaǵdaılaryna baqylaýdy kúsheıtýdi jáne turǵyndardy vaktsınatsııalaýdy uıymdastyrý jumysymen qamtýdy usyndy.
DDU mamandary Tájikstanda polıomıelıttiń órship ketýin alǵash ret Eýropada, 2002 jyldan bastap, tirkegen edi. Bul eldegi ınfektsııanyń sońǵy rastalǵan jaǵdaıy 1997 jyly tirkelgen. Qazir polıomıelıttiń oshaǵy Aýǵanstan, Pákistan, Indııa men Nıgerııada bar dep esepteledi.
