Tájikstanda polıtsııa bir jylda 13 myń adamnyń saqalyn alyp tastaǵan
ASTANA. QazAqparat - 2015 jyly Tájikstannyń Hatlan oblysynda jergilikti bılik 13 myń er adamnyń saqalyn kúshpen alyp tastaǵan. Sonymen qatar, 2 myń áıel óz erkimen hıdjab kııýden bas tartqan.
Bı-Bı-Sı agenttiginiń habarlaýynsha, quqyq qorǵaý organdary «tájik mádenıetine sáıkes kelmeıtin qundylyqtarmen» kúres barysynda osyndaı sharalardy qolǵa alǵan.
Tájikstannyń mılıtsııa qyzmetkerleri júz myńǵa jýyq saqaldy adamdardy ustaǵan. Olardyń aty-jónin anyqtap, saýsaqtarynyń izin alǵan soń saqaldaryn kúshpen qyryp tastaǵan.
«Jat qundylyqtardan arylyńdar! Dástúrli úlgimen tigilgen kıim kıińder, tájik áıeli úshin qara tús qaraly kúıdiń belgisi», - dep atap ótken memleket basshysy Emomalı Rahmon.
