Tájikstanda parlament saılaýynda daýys berý aıaqtaldy
Saılaý ýchaskeleri jergilikti ýaqytpen týra saǵat 20:00-de jabyldy.
Tájikstannyń saılaý jáne referendým jónindegi ortalyq komıssııasynyń basshysy Bahtıer Hýdoerzodanyń aıtýynsha, saılaý ashyq jáne demokratııalyq jolmen ótti.
«Saılaý ádil ótti. Komıssııaǵa kúni boıy eshqandaı aryz-shaǵym túsken joq», - deıdi B.Hýdoerzoda.
Munyń aldynda komıssııa jetekshisi saılaý barlyq talapqa saı ótti dep tanylǵanyn atap ótken edi. Óıtkeni saılaýshylardyń qatysý kórsetkishi belgilengen 50 paıyzdan joǵary boldy.
«Kúndizgi 15:00-ge deıin búkil elde 3 mln 703 myń 969 adam daýys berip úlgerdi. Bul – eldegi búkil saılaýshylardyń 75,1 paıyzy», - deıdi Bahtıer Hýdoerzoda.
Qazirgi ýaqytta komıssııa daýys sanaýǵa kirisip ketti. Saılaýdyń aldyn ala qorytyndysy 2 naýryzda jarııalanady.
Parlament saılaýynyń túpkilikti qorytyndysy eki apta ishinde belgili bolady.