Tájikstanda parlament saılaýy ótip jatyr
Tájikstannyń Saılaý jáne referendýmdar jónindegi ortalyq komıssııasynyń málimetinshe, saılaýdy uıymdastyrý jáne ótkizý úshin biryńǵaı jalpyrespýblıkalyq jáne 41 bir mandatty saılaý okrýgi quryldy.
Saılaý ýchaskeleri respýblıkanyń barlyq aımaqtarynda saǵat 06:00-den 20: 00-ge deıin jumys isteıdi. Respýblıkada 3 412 saılaý ýchaskesi bar.
Elden tys júrgen azamattar Tájikstannyń shet elderdegi elshilikteri men konsýldyq mekemelerinde daýys bere alady. Jalpy 30 elde 39 saılaý ýchaskesi ashyldy.
Saılaýǵa 63 depýtat saılanady. Olardyń 41-i - bir mandatty saılaý okrýgterinen jáne 22-si - biryńǵaı jalpyrespýblıkalyq saılaý okrýgindegi saıası partııalardyń tizimderi boıynsha.
Saılaý aldy jarysqa jeti partııa qatysty. Agrarlyq partııadan - 13 kandıdat, Sotsıalıstik partııadan - 5, Tájikstan Halyqtyq demokratııalyq partııasynan - 26, Ekonomıkalyq reformalar partııasynan - 7, Demokratııalyq partııadan - 4, Sotsıal-demokratııalyq partııadan - 5, Kommýnıstter partııasynan - 5 kandıdat.
Biryńǵaı jalpyrespýblıkalyq saılaý okrýginen 22 depýtattyq orynǵa 65 úmitker ótinish bergen.
Saılaý jáne referendýmdar jónindegi ortalyq komıssııasynyń málimetinshe, saılaýǵa qatysý úshin tizimge 4,9 mıllıonnan astam saılaýshy engizilgen.
Saılaýǵa túrli halyqaralyq uıymdardyń 230-dan astam baıqaýshysy qatysyp jatyr.
Saılaý jáne referendýmdar jónindegi ortalyq komıssııasynyń málimetinshe, 12:00-degi jaǵdaı boıynsha respýblıkada 2,3 mıllıonnan astam saılaýshy daýys bergen.
«12:00-degi jaǵdaı boıynsha respýblıkada 2 mıllıon 323 myń 516 azamat nemese saılaýshylardyń 47,1 paıyzy daýys berdi» - dep habarlady Tájikstannyń Saılaý jáne referendýmdar jónindegi ortalyq komıssııasynyń múshesi Hıdırzoda Mahfırat.
Saılaý jáne referendýmdar jónindegi ortalyq komıssııasy aldyn ala nátıjelerdi daýys berý aıaqtalǵannan keıin 24 saǵat ishinde jarııalaıdy. Parlament saılaýynyń sońǵy nátıjeleri eki apta ishinde jarııalanady.
