Tájikstanda kisi ólimi bolǵan jol apatyna kináli júrgizýshiler 15 jylǵa sottalady

ASTANA. QazAqparat - Tájikstan parlamentiniń tómengi palatasy Qylmystyq kodeks pen Ákimshilik quqyq buzýshylyq týraly kodeksterge ózgeris engizý jónindegi el prezıdenti usynǵan jobalardy biraýyzdan qoldady, dep habarlaıdy news.tj .

Atalǵan ózgeristerge sáıkes, júrgizýshilerdiń jaýapkershiligi kúsheıtiledi.

Tájikstan ІІM basshysy Ramazon Rahımzodtyń málimdeýinshe, jyl basynan bastap 20 tamyzǵa deıin respýblıkada 15 myńnan astam jol-kólik oqıǵasy tirkelip, onyń saldarynan 5 myń adam qaza taýyp, shamamen 18 myń adam túrli jaraqattar alǵan.

Mınıstrdiń aıtýynsha, jol-kólik apatyn jasaýshylardyń 2,5 myńy -júrgizýshi kýáliginsiz kólik júrgizgender jáne 1,7 myńy - mas kúıde kólik basqarǵandar.

Sonymen qatar, ákimshilik quqyq buzýshylyq jónindegi kodekstiń jeke baptaryna engizilgen ózgeristerge sáıkes, avtokólik basqarý quqyǵynan aıyrý merzimi 2 jyldan 10 jylǵa deıin arttyrylyp, qarastyrylǵan jazalar túri kúsheıtildi. 

Abaısyzda adam ólimine sebepker bolatyn nemese densaýlyǵyna aýyr jaraqat ákeletin mas kúıde jol júrý erejelerin buzý boıynsha 5 jyldan 10 jylǵa deıin bas bostandyǵynan aıyra otyryp, 10 jylǵa deıin  belgili bir laýazymdardy nemese qyzmetterdi atqarý quqyǵynan qosa aıyrý jazasy qarastyrylady.

Eger atalǵan jol apaty ekiden artyq adamnyń ólimine sebepker bolsa, 10 jyldan 15 jylǵa deıin bas bostandyǵynan aıyrý jazasy qarastyrylady. Buǵan qosa, 10 jyldan 20 jylǵa deıin belgili bir laýazymdardy nemese belgili bir qyzmetterdi atqarý quqyǵynan da aıyrý jazasy taǵaıyndalmaq.