Tájikstanda KazakhExport ókildiginiń keńsesi ashyldy
DÝShANBE. QazAqparat - Tájikstanda «KazakhExport» eksporttyq saqtandyrý kompanııasy» AQ ókildiginiń keńsesi ashyldy, dep habarlaıdy QazAqparat tilshisi.
«Tájikstandaǵy «KazakhExport» ókildigi keńsesiniń mindeti - bıznes qoǵmdastyqtarmen baılanys ornatý, kásipkerler men qarjylyq qurylymdarǵa «KazakhExport» quraldary týraly aqparat berý. Bul Qazaqstan men Tájikstan kásipkerleri arasyndaǵy jumysty aıtarlyqtaı jeńildetýge múmkindik beredi jáne soǵan oraı taýar aınalymy artady», - dedi keńseniń ashylýynda «KazakhExport» eksporttyq saqtandyrý kompanııasy» AQ basqarmasynyń tóraǵasy Rýslan Ysqaqov.
Tájikstan Respýblıkasy Saýda-ónerkásip palatasynyń tóraǵasy Djamshed Djýmahonzoda Tájikstan men Qazaqstan Úkimetteriniń eki eldiń arasyndaǵy taýar aınalymyn arttyrý tapsyrmasy bar ekendigin aıta kele, Dýshanbede «KazakhExport» keńsesiniń ashylýy mańyzdy oqıǵa bolyp sanalatyndyǵyn atap ótti.
«Tájikstan Respýblıkasy Saýda-ónerkásip palatasy oǵan járdem berip, qoldaý kórsetýge nıetti», - dedi ol.
Tájistandaǵy «KazakhExport» kompanııasynyń sheteldik ókildigi keńsesin tanystyrý barysynda tájik bankteriniń qazaqstandyq eksporttaýshylardy qoldaýy týraly ýaǵdalastyqqa qol jetkizildi. Atap aıtqanda, «KazakhExport» keńsesi Qazaqstannan Tájikstanǵa eksport júzege asyratyn qazaqstandyq óndirýshilerdi saqtandyrý men qarjylandyrý salasyndaǵy yntymaqtastyq týraly kelisimdi «Orıenbank» AQ, «Eshat banki» JAQ jáne «Tájikstannyń halyqaralyq banki» JAQ-pen rásimdedi.
Aıta keteıik, «KazakhExport» eksporttyq saqtandyrý kompanııasy» AQ 2019 jyldyń sońyna deıin Reseı Federatsııasynyń Máskeý, Novosibir, Ekaterınbýrg, Qytaı Halyq Respýblıkasynyń Sıan, Beıjiń qalalarynda, sonymen qatar Qyrǵyz jáne Belarýs Respýblıkalarynda jalpy 6 sheteldik ókildik keńsesin ashýdy josparlap otyr.
Avtory: Qurmat Samarhan
